Rais Mstaafu awamu ya nne akutana na Baraza la Madiwani Chalinze

Imewekwa: November 7th, 2022

RAIS MSTAAFU AWAMU YA NNE AKUTANA MADIWANI CHALINZE

Rais Mstaafu wa awamu ya nne,Mheshimiwa Dkt Jakaya Mrisho Kikwete amefanya mkutano na madiwani na watumishi wa halmashauri ya wilaya ya Chalinze leo katika Ukumbi wa Jakaya Kikwete katika halmashauri ya hiyo.

Mheshimiwa Kikwete amewataka madiwani kufanya kazi kwa bidii kuhakikisha halmashauri inasonga mbele kwa kuisimamia kwa weledi wa hali ya juu katika kuiletea maendeleo halmashauri na wananchi wa chalinze kwa ujumla kunufaika.

“Hatima ya Maendeleo ya halmashauri ya Chalinze iko mikononi mwenu,mambo yakiharibika hamuwezi kukwepa kama ilivyo kwa serikari kuu mambo yakiharibika wabunge hawawezi kukwepa.” Kikwete alisema.

Aliendelea kuwaasa madiwani kuisaidia halmashauri kusonga mbele kwa kutoa mawazo ya kujenga kuhakikisha eneo la Chalinze linakuwa na huduma za jamii kama maji,barabara,elimu bora na umeme. Sanjari na nasaha hizo Mheshimiwa Kikwete aliwataka madiwani kuwa na shughuli za kuwaingizia kipato pasipo kutegemea halmashauri. 

Vivyo hivyo alizungumza kuhusu utendaji wa wakuu wa Idara na watumishi kwa ujumla na kuwataka kufanya kazi kwa weledi na tija na kuifanya halmashauri ipige hatua kutoka ilipokuwa kwenda sehemu nyingine.

“Wakuu wa Idara mnatakiwa kujipima na kuona umuhimu wa ninyi kuwa katika nafasi mlizonazo kwa kutoa mchango chanya, kupanga mipango inayotekelezeka na kutoa matokeo pia mnatakiwa kujihoji tangu nifike hapa mpaka sasa nimefanya kitu gani chenye matokeo.”Kikwete alisisitiza.

Aidha Dkt Kikwete aliwataka madiwani na wataalam kufanya kazi kwa ushirikiano katika kuwaletea maendeleo wananchi na kuondoa tofauti zao kwa kujadiliana na kufikia muafaka pasipo kuathiri mipango ya maendeleo. Aliendelea kueleza katika kikao hicho kwa kueleza umuhimu wa Chalinze na mwonekano wake kijiografia na kuwahoji watendaji pamoja na madiwani wamejiandaa vipi ili kunufaika na ujenzi wa bandari ya nchi kavu ya Kwala inayoendelea kujengwa.

“Bandari ya nchi kavu inayoendelea kujengwa kule Kwala ni fursa kwa wanachalinze kama ninyi viongozi mmejipanga ili wananchi wenu waweze kunufaika katika uzalishaji na pia upatikanaji wa ajira na hivyo ndivyo vitu mnatakiwa kujadili kama madiwani.” Kikwete alisema.

Kwa upande wake Mkuu wa wilaya ya Bagamoyo Mheshimiwa Zainab Abdallah Issa alisema Chalinze ni chachu ya uchumi katika nchi kutoka na jiografia yake kwani Chalinze ina vivutio vingi vya kiuchumi ambavyo vikiwekewa mazingira wezeshi wananchi watanufaika kiuchumi na kuondokana na ufukara wa kipato.

Naye Mwenyekiti wa Halmashauri ya Chalinze Meshimiwa Hassani Mwinyikondo kwa niaba ya madiwani na wananchi wa Chalinze alipokea ushauri na maelekezo kutoka kwa Rais Mstaafu wa Awamu ya nne wa Jamhuri ya Muungano wa Tanzania Dkt Jakaya Mrisho Kikwete.

“Binafsi nakiri kupokea ushauri na maelekezo kutoka kwa Mzee wetu na kuahidi kuyafanyia kazi kwa maslahi ya wanachalinze na watanzania kwa ujumla,kwa kweli leo tumepata semina kutoka kwa Rais Mstaafu na uzoefu mbalimbali katika kuwaongoza na kuwatumikia wananchi asante sana kwa yote.” Mwinyikondo alisema.

Akitoa neno la shukrani,Mheshimiwa Ridhiwani Jakaya Kikwete(Mb) na Naibu Waziri wa Ardhi,Nyumba na Maendele ya Makazi kwa nasaha zilizotolewa na Rais Mstaafu wa awamu ya nne, Dkt Jakaya Kikwete. Mheshimiwa Ridhiwani alimshukuru na kumpongeza Mzee Kikwete kwa yote aliyoyasema na kuahidi kuyafanyia kazi na kujipanga kimkakati kwani Chalinze ni eneo ambalo ni chachu ya uchumi, hivyo tukiweka miundombinu stahiki watu wetu wataondokana na umasikini.

“Mgeni Rasmi katika kikao hiki umetufundisha mengi na yenye tija katika halmashauri yetu, tunaahidi kuwa kitu kimoja katika utekelezaji wa shughuli zetu katika kuwaletea maendeleo wanachalinze na watanzania kwa ujumla, tunaahidi kuzifanyia kazi nasaha zote ulizotupatia, asante sana.” Ridhiwani alisema.