Rais Mstaafu Kikwete apiga kura Uchaguzi wa Serikali za Mitaa Msoga

Imewekwa: November 27th, 2024

Rais Mstaafu wa Awamu ya Nne, Dkt. Jakaya Mrisho Kikwete, leo ameungana na wakazi wa Kijiji cha Msoga kupiga kura katika uchaguzi wa Serikali za Mitaa. Dkt. Kikwete ameshiriki katika zoezi hilo kwa kuchagua Mwenyekiti wa Kijiji, Mwenyekiti wa Kitongoji, na Wajumbe wa Halmashauri ya Kijiji watakaoongoza kwa miaka mitano ijayo.

Katika hatua hiyo muhimu ya kidemokrasia, Waziri wa Nchi, Ofisi ya Waziri Mkuu Kazi, Ajira, Vijana na Watu Wenye Ulemavu, Mheshimiwa Ridhiwani Kikwete, naye alijitokeza kijijini Msoga kutekeleza haki yake ya kikatiba. Ridhiwani, ambaye pia ni mkazi wa Msoga, alisisitiza umuhimu wa wananchi kushiriki kikamilifu katika kuwachagua viongozi bora wa ngazi za kijiji na kitongoji.

Uchaguzi huo umefanyika nchi nzima kwa mujibu wa ratiba iliyotolewa na Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI), Mheshimiwa Mohamed Mchengerwa. Uchaguzi wa Serikali za Mitaa umefanyika kwa amani na umezingatia kanuni za uchaguzi wa mwaka 2024.

Katika Halmashauri ya Wilaya ya Chalinze, wananchi wamejitokeza kwa wingi kushiriki uchaguzi katika vijiji 74 na vitongoji 469. Katika maeneo hayo, idadi kubwa ya wapiga kura walifika kwenye vituo vyao mapema ili kuhakikisha wanawachagua viongozi wanaoendana na matarajio yao ya maendeleo.

Dkt. Kikwete alipongeza mwamko wa wananchi wa Msoga na taifa kwa ujumla katika kushiriki mchakato wa demokrasia. Alisema kuwa ushiriki wa wananchi ni msingi wa kujenga serikali za mitaa imara na zinazowajibika. “Huu ni ushahidi kwamba Watanzania wanathamini demokrasia na uwajibikaji,” alisema Rais Mstaafu Kikwete baada ya kupiga kura.

Uchaguzi wa Serikali za Mitaa unatoa fursa ya kipekee kwa wananchi kuchagua viongozi wa karibu watakaoongoza juhudi za maendeleo kwenye jamii. Ofisi ya Rais TAMISEMI itaendelea kutoa taarifa kuhusu mwenendo wa zoezi hilo nchi nzima huku ikiwasihi wananchi kudumisha amani.