RC Kunenge afanya ziara ya ukaguzi kituo cha kupoza umeme Chalinze

Imewekwa: July 25th, 2022

Mkuu wa Mkoa wa Pwani leo amefanya ziara ya kuutembelea na kukagua ujenzi wa Mradi wa kupoza umeme uliopo Magome Halmashauri ya Chalinze ili kujionea ni kwa namna gani shughuli za ujenzi wa mradi huo unavyoendeshwa.

Akizungumza mara baada ya ukaguzi wa mradi huo Mkuu wa Mkoa wa Pwani Mhe. Abuubakar Kunenge ametoa shukrani za dhati kubwa kwa Mheshimiwa Rais wa Jamhuri ya Muungano Tanzania kwa kuendelea kuhakikisha kuwa yale yote aliyotuahidi Mkoa wa Pwani anayatekeleza kwa vitendo na kwa haraka.

“Leo hii tuko hapa kushuhudia mradi mkubwa wa kituo cha kupoza umeme na kwa dhati nimshukuru Rais wetu wa Jamhuri ya Muungano wa Tanzania Mhe.Samia Suluhu Hassan kwa kuyatekeleza yale yote aliyosema kwa vitendo kwani Mheshimiwa Rais aliahidi na kuliambia Taifa kuwa Mkoa wa Pwani ambao ni Mkoa wa kimkakati utapata nishati ya maji na umeme kwa matumizi ya wananchi pamoja na matumizi ya kiuchumi ikiwa ni pamoja na viwanda na mradi mkubwa wa Treni za Mwendo kasi (SGR)”. Amesema Mhe. Kunenge.

Hata hivyo Mhe. Kunenge amewaasa vijana waliopata nafasi na ambao watapata nafasi za kufanya kazi katika mradi huo kuepukana na udanganyifu na wizi na badala yake wafanye kazi kwa bidii kwa fursa zinazopatikana katika maeneo yao hasa hili la mradi wa Umeme.

Aidha Meneja wa Mradi huo kutoka TANESCO Mhandisi Newton Livingstone amesema kuwa mradi huo una thamani ya Dolla Mil.42.5 za Kimarekani na mpaka kufikia jana mradi huu umefikia 17% na kwa awamu ya kwanza mradi huu  unaatarajiwa kuzalisha umeme wa  MW1000 na kwa awamu ya pili utazalisha umeme wa MW 2115 kwa ujumla.

Mradi huo wa umeme unamilikiwa na Shirika la Umeme Tanzania (TANESCO) na upo chini ya Mkandarasi Mkuu wa Kampuni ya TBEA kutoka China pamoja na Mkandarasi mshauri Kampuni ya SHAKER kutoka nchini Misri.