RC Kunenge awataka Madiwani Chalinze kujifunza siku zote

Imewekwa: April 16th, 2022

Mkuu wa Mkoa wa Pwani,Abubakari Kunenge amewataka Madiwani wa Chalinze wawe watu wa kujifunza na kusikiliza kutoka kwa watu mbalimbali ili kuwa na weledi wa kutosha kuweza kuwatumikia wananchi na kutatua kero za wananchi.

Rai hiyo ameitoa Kunenge alipokuwa akifungua mafunzo ya kuwajengea uwezo Madiwani katika utendaji kazi wao kama wawakilishi wa wananchi katika mamlaka za serikali za mitaa, katika ukumbi wa Halmashauri ya wilaya ya Chalinze.

Mkuu wa Mkoa Katika mafunzo hayo amewataka madiwani kwa kushirikiana na watendaji kuibua vyanzo vipya vya mapato na siyo kubaki na vyanzo vya zamani, “hivyo kama madiwani mnatakiwa kuwa na ufahamu wa sheria ili kufanya maamuzi sahihi katika vikao na kuwa wabunifu katika kuiendeleza halmashauri.” Mkuu wa Mkoa  alisema.

Madiwani wa Halmashauri ya wilaya ya Chalinze wamepata mafunzo ya kujengewa uwezo katika Ufuatiliaji na Upimaji Shughuli za Halmashauri.

Mafunzo hayo yalilenga kuwajengea uwezo katika uendeshaji wa masuala mbalimbali ya Halmashauri ikiwa ni pamoja na usimamizi wa ukusanyaji wa mapato ya ndani na matumizi sahihi ya fedha za serikali katika mamlaka za serikali za mitaa.

Mwezeshaji wa Mafunzo hayo Afisa Serikali za Mitaa kutoka Ofisi ya Mkuu wa Mkoa ,Bwana Rashid Baghdellah akitoa mada mbalimbali katika mafunzo hayo aliwataka madiwani kujua wajibu wao kama wawakilishi wa wananchi katika mamlaka za serikali za mitaa na kuisimamia halmashauri katika utekelezaji wa miradi mbalimbali ya maendeleo kama ufuatiliaji na upimaji wa miradi mbalimbali ya maendeleo katika ngazi ya Halmashauri,Usimamizi wa Ujasiriamali na Fursa katika Mazingira wanakoishi waheshimiwa Madiwani.

Mwenyekiti wa Halmashauri ambaye pia ni Mwenyekiti wa mafunzo hayo, Mheshimiwa Hassan Mwinyikondo, ameishukuru Halmashauri yake kupitia Mkurugenzi Mtendaji kwa kuandaa mafunzo ya kuwawezesha madiwani katika utendaji wa shughuli zao kama wawakilishi wa wananchi katika Mamlaka za Serikali za Mitaa.”Hakika kupitia mafunzo haya kama madiwani tumejengewa uwezo na hakika tumebadilika na tutaisimamia halmashauri kwa kuzingatia sheria,taratibu na kanuni ili kuwaletea wananchi maendeleo.” Mwinyikondo alisema.

Madiwani wakiendelea na Mafunzo katika Ukumbi wa Halmashauri