RC Kunenge awataka wahitimu kutoa huduma bora kwa wananchi wa Chalinze

Imewekwa: October 17th, 2025

Mkuu wa Mkoa wa Pwani, Mheshimiwa Abubakar Kunenge, leo hii amefunga rasmi mafunzo ya viongozi waandamizi wa Halmashauri ya Wilaya ya Chalinze yaliyokuwa yakitolewa na Shule ya Uongozi ya Mwalimu Julius Nyerere iliyopo Manispaa ya Kibaha. Mafunzo hayo yamekusudia kuwajengea uwezo Wakuu wa Idara na Vitengo katika nyanja za uongozi, usimamizi na utawala bora.

Mafunzo hayo yaliyodumu kwa siku sita yamehusisha jumla ya washiriki 28 ambao ni Wakuu wa Idara na Vitengo kutoka Halmashauri ya Chalinze. Kupitia mafunzo hayo, washiriki wamepata ujuzi na maarifa yatakayowawezesha kuboresha utendaji kazi wao na kutoa huduma bora kwa wananchi kwa kuzingatia maadili ya utumishi wa umma.

Akizungumza katika hafla ya kufunga mafunzo hayo, Katibu Tawala wa Mkoa wa Pwani, Bi Pili Mnyema, alimpongeza Mkurugenzi wa Halmashauri ya Wilaya ya Chalinze, Bwana Ramadhani Possi, kwa ubunifu wake wa kuandaa programu hiyo muhimu. Alisema ubunifu huo unaonesha dhamira ya dhati ya uongozi wa halmashauri katika kuwekeza kwenye rasilimali watu kama nyenzo muhimu ya maendeleo.

Bi Mnyema aliwataka viongozi wengine katika Halmashauri za Mkoa wa Pwani kuiga mfano huo kwa kuhakikisha watumishi wao wanapata mafunzo ya aina hiyo katika Shule ya Uongozi ya Mwalimu Nyerere. Alisema kufanya hivyo kutasaidia kuongeza ufanisi na uwajibikaji wa watumishi wa umma katika kutekeleza majukumu yao ya kila siku.

Kwa upande wake, Mkuu wa Mkoa wa Pwani, Mheshimiwa Kunenge, aliipongeza Halmashauri ya Chalinze kwa kuwa mstari wa mbele katika kuwekeza kwenye mafunzo ya viongozi wake. Alisema hatua hiyo ni muhimu katika kujenga misingi imara ya utawala bora na kuimarisha utoaji wa huduma kwa wananchi.

Aidha, Kunenge aliwataka wahitimu wa mafunzo hayo kutumia maarifa waliyopata katika kutatua changamoto zinazowakabili wananchi na kuongeza tija katika utendaji kazi wa halmashauri. Alisisitiza kuwa elimu waliyoipata inapaswa kuonekana katika matokeo ya kazi zao na kubadilisha mtazamo wa utoaji huduma serikalini.

Mkuu wa Mkoa pia alihimiza viongozi hao kuwa mfano wa kuigwa katika maeneo yao ya kazi kwa kuzingatia maadili, uwajibikaji na ubunifu katika kutekeleza majukumu yao. Alimalizia kwa kusema kuwa Serikali itaendelea kuunga mkono jitihada za Halmashauri zinazochukua hatua za kuwajengea uwezo watumishi wake kama njia ya kuimarisha maendeleo endelevu kwa wananchi wa Mkoa wa Pwani na taifa kwa ujumla.