RC Kunenge: Hati Safi Kawaida yetu Chalinze

Imewekwa: June 21st, 2023

                 Na John Mlyambate

Mkuu wa Mkoa wa Pwani, Mheshimiwa Abubakar Kunenge ameupongeza uongozi wa Halmashauri ya wilaya ya Chalinze kwa kupata Hati Safi(Unqualified report). Mkuu wa Mkoa amezitoa pongezi hizo leo katika kikao cha Baraza la Madiwani kilichoketi leo katika Ukumbi wa mikutano wa Jakaya Kikwete.

Mheshimiwa Kunenge ametoa pongezi hizo baada ya Mkurugenzi Mtendaji wa Halmashauri ya wilaya ya Chalinze, Bwana Ramadhani Possi kuwasilisha taarifa ya Hoja na Majibu ya Mkaguzi wa Nje kwa mwaka wa Fedha 2021/2022. Taarifa hiyo iliwasilishwa kwa mujibu wa Agizo la 31 la Randama ya Fedha katika Mamlaka za serikali za Mitaa ya mwaka 2009.

Akitoa pongezi hizo Mheshimiwa Kunenge ameipongeza Halmashauri ya Chalinze kwa kuzingatia matumizi sahihi ya fedha za serikali kwa kupata Hati safi mfululizo kwa miaka yote tangu ianzishwe halmashauri hiyo mwaka 2016. Ametoa pongezi kwa waheshimiwa Madiwani kwa usimamizi bora wa fedha na mali za halmashauri na kuwapongeza Menejimenti ya Halmashauri kwa kufanya kazi kwa uaminifu na ueledi katika kuwaletea maendeleo wananchi.

“Halmashauri ya Chalinze kupata Hati Safi ni kawaida yetu tusijipime kwa kufunga hoja bali tujipime kwa kutozalisha hoja na mipango yetu iendane na vipaumbele halisi(Reflection of the Planning Priorities).” Mheshimiwa Kunenge alisema.

Mkuu wa Mkoa katika Hotuba yake alisisitiza utekelezaji wa miradi ya maendeleo kwa wakati kwani miradi ni jibu la kero za wananchi na jibu la maendeleo ya wananchi ambao wametoa ridhaa kwa serikali ya Dkt Samia Suluhu Hassan kuwaletea maendeleo wananchi wa Chalinze na watanzania kwa ujumla.

Adha Mheshimiwa Kunenge alitaka Halmashauri ya Chalinze kubuni na kuanzisha vyanzo vipya vya mapato ili kuwa na uhakika wa kukusanya mapato na kufikia malengo ya bajeti,kwani kunapokuwa na vyanzo vingi vya mapato hata kama kutatokea msukosuko katika ukusanyaji mapato halmashauri huweza kufikia malengo yake pasipo shaka.

Kwa upande wake Katibu Tawala wa Mkoa wa Pwani Bwana Rashid Mchata alitoa pongezi za dhati kwa Halmashauri ya Chalinze kwa kazi nzuri inazoendelea kuzitekeleza,ujenzi bora wa ofisi ya Halmashauri na akapongeza ubora wa samani zilizopo katika jengo la halmashauri kwa kutengenezwa kutokana na mbao ngumu(Hard wood).

Mchata aliendelea kulipongeza Baraza la madiwani na wataalam kwa upande wa ukusanyaji mapato na kusisitiza kukusanya mapato hayo kwa kufuatilia kila chnzo kwa umakini na akataja baadhi ya vyanzo ambavyo havijafikia asilimia takiwa kama mpunga na pamba katika sekta ya kilimo. Hata hivyo Katibu Tawala wa Mkoa alitoa pkngezi kwani mpaka leo halmashauri ya Chalinze ilikuwa imefikia asilimia 99 ya ukusanyaji wa mapato yake kwa mwaka wa fedha 2022/2023 na kuwataka kuongeza bidii ili kukamilisha ndani ya siku chache zilizobakia.

Naye Mkuu wa wilaya ya Bagamoyo,Mheshimiwa Halima Okash alilipongeza Baraza la Madiwani,Wakuu wa Idara na Vitengo wakiongozwa na Bwana Ramadhani Possi kwa kufanya kazi kama timu katika kuwaletea maendeleo wananchi wa Chalinze na kuwataka kuundeleza utamaduni huo kwa ufanisi zaidi.

Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo alihitimisha kikao cha Baraza la Madiwani kwa kupokea pongezi zilizotolewa na viongozi mbalimbali wakiongozwa na Mkuu wa Mkoa wa Pwani na kuahidi kuufanyia kazi ushauri uliotolewa na viongozi hao. Mheshimiwa Mwinyikondo aliahidi kuufanyia kazi ushauri uliotolewa na Mheshimiwa Kunenge wa kutozalisha hoja tena bali kutekeleza miradi ya maendeleo kwa wakati ili kuweza kupunguza kero za wananchi kwani ndiyo majawabu halisi kwa wanchi.

Aidha Mwinyikondo alitoa ombi kwa Mkuu wa Mkoa kutoa fursa kwa kuitafutia Chalinze wawekezaji wa masuala mbalimbali ya kiuchumi kwani Chalinze ina ardhi ya kutosha kwa uwekezaji mbalimbali.