Ridhiwani Kikwete akabidhi misaada kwa watoto wenye mahitaji maalum Chalinze

Imewekwa: January 9th, 2023

RIDHIWANI KIKWETE AKABIDHI MISAADA KWA WATOTO WENYE MAHITAJI MAALUM  CHALINZE.

Naibu Waziri wa Ardhi Nyumba na Maendeleo ya Makazi ,Mheshimiwa Ridhiwani Kikwete leo amekabidhi misaada mbalimbali ya vifaa vya kujifunzia katika Shule ya Msingi Chalinze kata ya Pera. Vifaa hivyo Amevikabidhi kwa wanafunzi wa Shule hiyo ambayo ina Kitengo cha Elimu maalum ili viweze kuwawezesha kujifunza kwa urahisi.

Vifaa vilivyokabidhiwa kwa wanafunzi hao ni daftari 300,boksi 25 za kalamu boksi 20 za penseli,mashati ya shule 114,sketi 15,kaputula 35,soksi jozi 100,vesti 60,mabegi ya mitumba 10,viatu vya mtumba jozi 20 na nguo mbalimbali kwa matumizi ya wanafunzi hao.

Vifaa hivyo vimetolewa na Taasisi ya Kumbukumbu ya Mwalimu Julius Kambarage Nyerere kwa kushirikiana na Charity Event Group.

Akitoa taarifa ya Taasisi hizo Katibu wa Taasisi hiyo Bwana Omary Abdul ameeleza malengo ya Taasisi hizo kuwa ni kushirikiana na Serikali ili kuweza kutoa huduma stahiki kwa wanafunzi wanaosoma katika mazingira magumu ili kuwakwamua waweze kufikia ndoto zao za kielimu kwani Elimu ni haki ya Msingi ya mtoto.

 Naye mgeni rasmi katika Hafla hiyo Mheshimiwa Ridhiwani Kikwete aliyeambatana na waheshimiwa Madiwani wa kata za Bwilingu na Pera pamoja na Mkurugenzi Mtendaji wa Halmashauri ya Chalinze Bwana Ramadhani Possi alizipongeza Taasisi zilizowezesha upatikanaji wa vifaa hivyo kwa ajili ya watoto wenye mahitaji maalum na kuzitaka Taasisi zingine ziige mazuri yanayofanywa na Taasisi ya Mwalimu Julius Nyerere katika kuboresha tendo la kujifunza.

Naye Diwani wa kata ya Pera,Mheshimiwa Jackson Mkango kwa niaba ya wananchi wa Kata ya Pera alitoa shukrani zake za dhati kwa Taasisi hizo zilizoonyesha moyo wa kusaidia watoto wenye mahitaji maalum hatimaye kuongeza kiwango cha ufaulu wa wanafunzi katika Kata na Halmashauri kwa ujumla.

Kwa upande wake Mkurugenzi Mtendaji wa Halmashauri ya Halmashauri ya Chalinze Bwana Ramadhani Possi alizipongeza Taasisi hizo kwa kuendelea kuboresha mazingira ya kufundishia na kujifunzia kwa kutoa vifaa wezeshi ambavyo vitatatua changamoto ya ukosefu wa vifaa vya kujifunzia kwa wanafunzi wenye mahitaji maalum katika Halmashauri yetu “ Nitoe wito kwa Taasisi na mashirika mbalimbali ya kiserikali na yasiyo ya kiserikali kuendelea kushirikiana nasi katika kuwahudumia watoto wetu karibuni sana tunaahidi kuwapa ushirikiano wa hali na mali.” Mkurugenzi alisema.