Ridhiwani Kikwete ataka maboresho yanayofanywa sekta ya Elimu yaendane na matokeo chanya

Imewekwa: February 25th, 2024

NAIBU Waziri Ofisi ya Rais Utumishi na Utawala Bora Ridhiwani Kikwete  amesema maboresho yanayofanyika katika sekta ya elimu ni kuhakikisha elimu bora inapatikana ufaulu unaongezeka na si kuzalisha vijana ambao hawataleta mabadiliko ya maendeleo kwenye maeneo yao.

Pia amesema ujenzi wa Hospitali ya Msoga na maboresho yanayofanyika mara kwa mara ni kwa ajili ya huduma bora kwa wananchi na si kukata miguu ya waendesha bodaboda.

Ridhiwani ambaye pia ni Mbunge wa Jimbo la Chalinze aliyasema hayo mwishoni mwa wiki alipokuwa katika shule ya sekondari Mboga, kwenye hafla ya makabidhiano ya vifaa vya mradi wa maabara za kompyuta  kwa shule nne za Sekondari Halmashauri ya Chalinze.

Katika makabidhiano ya kompyuta hizo zilizotolewa na Shirika lisilo la kiserikali la Reneal International Education Outreach, Naibu Waziri huyo alisisitiza wanafunzi kujikita kwenye masomo na kuachana na tamaa ambazo zinarudisha nyuma maendeleo.

"Wapo waliotangulia kuolewa kabla ya muda angalieni maisha yao yalivyo duni, achaneni na makundi ambayo hayana tija kwenu sikubali kuona mnafeli na kwenda kuendesha bodaboda wakati mazingira ya elimu yameboreshwa kwa asilimia kubwa" alisisitiza.

Alisema awali shule za kata zilikuwa nyuma kwenye upande wa tehama lakini sasa maboresho yanaendelea kuhakikisha wanajifunza somo hilo na kwenda na teknolojia ya sasa

Alikemea tabia ya baadhi ya Wazazi kushawishi watoto wao kufeli kwenye mitihani yao ya kitaifa Ili wasiendelee na masomo wakidai kukwepa gharama jambo ambalo si sahihi kwani tayari Serikali imeondoa ada shuleni.

Ridhiwani ameishukuru Shirika hilo kwa kuwezesha kompyuta hizo ambazo zitawasaidia wanafunzi kuondokana na kutafuta vitu vingi maktaba ambavyo watavipata kwa urahisi kwenye kompyuta.

Awali Afisa Elimu Sekondari Salama Ndyetabura aliwaelekeza walimu na wanafunzi kuona namna Bora ya kuvitunza vifaa hivyo Ili viweze kuwa na manufaa kwa vizazi vya sasa na baadae.

Alisema Halmashauri hiyo ambayo inashule za Sekondari 26 nne pekee ndio zimenufaika na msaada huo wenye thamani ya sh. 71.1 Milion ambazo ni Mboga, Msata, Mdaula na Mandera lengo likiwa ni kusaidia ujifunzaji na ufundishaji wa masomo hususani ya sayansi .

Alimshukuru Mbunge huyo kwa kufanikisha upatikanaji wa vifaa hivyo  ambavyo vinakwenda kurahisisha ufanyaji wa masomo ya sayansi kwa vitendo kupitia kompyuta, walimu kuandaa masomo na matokeo kwa wakati na kuibua na kumkuza vioawa vya wawanafunzi katika matumizi na maendeleo ya teknolojia.

Afisa Tehama Wizara ya Habari  Mawasiliano  na Teknolojia ya Habari ambaye pia ni mratibu wa Shirika lililotoa msaada huo alisema Mbunge wa Jimbo hilo aliomba kompyuta kwa shule zote za Sekondari za Jimbo hilo na kwa kuanzia wametoa kompyuta 20.