Sekretarieti ya maadili yatoa Elimu ya maadili katika kipindi cha “Gumzo leo” Chalinze fm 97.5

Imewekwa: December 1st, 2025

Sekretarieti ya Maadili ya Viongozi wa Umma leo  Desemba Mosi,2025 imetoa elimu kuhusu umuhimu wa kuzingatia maadili katika utumishi wa umma kupitia kipindi cha Gumzo Leo kinachorushwa na kituo cha redio cha Chalinze FM 97.5 kuanzia saa 4:00 asubuhi hadi saa 7:00 mchana.

 Katika mahojiano hayo, Afisa Uchunguzi Mkuu wa Sekretarieti ya Maadili ya Viongozi wa Umma Kanda ya Dar es Salaam, George Bakengesa, ameeleza historia ya kuanzishwa kwa Sekretarieti hiyo kupitia Ibara ya 132(1) ya Katiba ya Jamhuri ya Muungano wa Tanzania ya mwaka 1977, ambayo imepelekea kutungwa kwa Sheria ya Maadili ya Viongozi wa Umma, Sura ya 368.

Akifafanua  majukumu ya taasisi hiyo Bakengesa amesema ni pamoja na  kupokea na kuchunguza malalamiko ya ukiukwaji wa maadili, kupokea na kuhakiki tamko la mali na madeni ya viongozi wa umma, pamoja na kutoa elimu kwa viongozi na wananchi kuhusu uadilifu na uwajibikaji.

Aidha Akibainisha baadhi ya matendo yanayokiuka maadili kwa mujibu wa Sheria ya Maadili Sura ya 398, amesema kutowasilisha tamko, kutoa tamko la uongo, mgongano wa maslahi, matumizi mabaya ya madaraka na kuomba au kupokea zawadi. Adhabu zinazoweza kutolewa ni pamoja na onyo, kushushwa cheo, kufukuzwa kazi au adhabu nyingine kulingana na sheria za nidhamu.

Kwa upande wake Afisa Uchunguzi  Sekretarieti ya maadili ya uma  Emma Raphael Masilamba amesema maadhimisho ya Wiki ya Maadili yanashirikisha taasisi mbalimbali za umma ikiwemo Sekretarieti ya Maadili ya Viongozi wa Umma, TAKUKURU, Ofisi ya Taifa ya Ukaguzi, Ofisi ya Haki za Binadamu, Wizara ya Katiba na Sheria, pamoja na Ofisi ya Rais Utumishi na Utawala Bora.

Vile vile Masilamba amesema kwa Kanda ya Dar es Salaam, maadhimisho ya mwaka huu yanafanyika kuanzia tarehe 1 hadi 10 Desemba huku yakiambatana na utoaji wa elimu kupitia vipindi vya redio pamoja na kongamano maalum la wanafunzi wa vyuo vikuu litakalofanyika katika Chuo cha Elimu ya Biashara (CBE) tarehe 5 Desemba 2026.

Pia  amesema  kongamano hilo ni fursa kwa vijana kujadili masuala ya maadili na kuhamasishwa kuzingatia uzalendo na maslahi ya taifa katika maisha ya kila siku.

Maadhimisho ya Wiki ya  Maadili huadhimishwa Duniani kote,yakiongozwa na  kaulimbiu isemayo “Kwa pamoja, tujenge jamii yenye maadili, haki za binadamu na vita dhidi ya rushwa ili kuimarisha utawala bora.”,huku Kauli mbiu hiyo ikilenga kukumbusha  kila mmja ana jukumu la kushiriki katika ujenzi wa Taifa lenye haki,uwazi na uadilifu.