Sekretarieti ya maadili yawataka Viongozi kuzingatia maadili ili kuimarisha uadilifu.

Imewekwa: December 3rd, 2025

Afisa wa Maadili kutoka Sekretarieti ya Maadili ya Viongozi wa Umma, Silvanus Njenga, amewataka viongozi na jamii kwa ujumla kuendelea kuzingatia misingi ya maadili ili kuimarisha uadilifu na uwajibikaji katika utumishi wa umma.

Ameyasema hayo leo Desemba 3, 2025 alipokuwa akifanya mahojiano kwenye kipindi cha Gumzo Leo kinachorushwa na Kituo cha Redio cha Chalinze FM 97.5 kila Jumatatu hadi Ijumaa kuanzia saa 4:00 hadi saa 7:00 .Njenga amesema sehemu ya tatu ya Sheria ya Maadili ya Viongozi wa Umma inaelekeza maadili yanayotakiwa kufuatwa na viongozi wote kwa mujibu wa Katiba ya Jamhuri ya Muungano wa Tanzania.

Aidha amesema sehemu hiyo ya sheria inawataka viongozi wa umma kutoa Tamko la Mali na Madeni yao kila mwaka pindi wanapoteuliwa au wanapoacha nyadhifa, huku kifungu cha 10 na 11 kikiainisha mali zinazotakiwa kutolewa tamko.

 Pia Njenga amesema kifungu cha 12(1) cha Sheria ya Maadili ya Viongozi wa Umma Na. 13 ya mwaka 1995 kinakataza viongozi kujinufaisha kwa kutumia taarifa za kikazi, kutoa taarifa kwa watu wasioruhusiwa, kushinikiza maamuzi yasiyofaa, kutumia mali za Serikali kwa maslahi binafsi na kupokea maslahi ya kiuchumi kinyume cha utaratibu isipokuwa zawadi ndogo au zawadi kutoka kwa ndugu wa karibu.

Akifafanua kwa mujibu wa kifungu cha 9(1), amesema viongozi wanapaswa kutoa tamko la rasilimali na madeni ndani ya siku 30 mara baada ya kuteuliwa.Vile vile amesema ifikapo Desemba 31 ya kila mwaka pia na wanapoacha madaraka.

Sanjari na hayo ametaja mali zinazopaswa kutamkwa kuwa ni fedha taslimu, amana, hisa, nyumba, magari, mashamba, mifugo, madini, mitambo na maslahi mengine ya kibiashara pamoja na madeni ya mwenza na watoto walio chini ya miaka 18.Njenga amesema tamko la mali ni muhimu kwa kuongeza uwazi, kudhibiti mgongano wa maslahi, kupunguza matumizi mabaya ya madaraka, kuzuia rushwa na kuongeza uadilifu kwa viongozi wa umma.

Ikiwa ni maadhimisho ya wiki ya maadili Duniani kwa Kanda ya Dar es salaam yanaadhimishwa kuanzia tarehe 1 Desemba hadi tarehe 12 kwa kutoa elimu kupitia vipindi vya Redio na Kongamano maalum la wanafunzi wa vyuo vikuu kutoka maeneo mbalimbali.