Serikali yamwaga vishikwambi kwa maafisa ugani wa kilimo mkoani Pwani

Imewekwa: November 23rd, 2023

Serikali ya Jamhuri ya Muungano wa Tanzania Kupitia wizara ya Kilimo imegawa Vishikwambi kwa Maafisa ugani wa kilimo wote katika mkoa wa Pwani kwa maana ya Halmashauri zote tisa katika mkoa wa Pwani. Vishikwambi hivyo vimekabidhiwa leo hii na Mkuu wa Mkoa wa Pwani Mheshimiwa Abubakar Kunenge katika Ukumbi wa Ofisi ya Mkuu wa Mkoa.

Akikabidhi Vishikwambi hivyo Mkuu wa mkoa amewata Maafisa ugani wa kilimo kuzingatia malengo makuu ya vitendea kazi hivyo kuwa ni Kuhakikisha usajili wa wakulima kwenye Mifumo ya pembejeo unafanyika kwa wakati na kwa ufanisi unaotakiwa. Pili upatikanaji na usambazaji wa taarifa muhimu za shughuli za ugani zinapatikana kwa wakati takiwa. Tatu kuhakikisha uchukuaji matukio mashambani na utoaji wa elimu kwa njia ya video unafanyika kwa wakati.Nne kurahisisha usambazaji wa Teknolojia za kisasa za kilimo na mwisho Vishikwambi hivi vitumike kupima ukubwa wa maeneo kwa kutumia program tumizi ya GPS kwani Vishikwambi hivyo vimeungwa na program ya GPS.

Mkoa wa Pwani umepokea Vishikwambi 345 kwa ajili ya Maafisa ugani wa kilimo kwa mkoa mzima. Mkuu wa mkoa amekabidhi Vishikwambi hivyo kwa maafisa kilimo wa Halmashauri za wilaya ili nao wakakabidhi kwa maafisa ugani wao.”Vishikwambi hivi vikalete tija katika sekta ya kilimo na kila afisa Ugani wa kilimo akabidhiwe kwa matumizi lengwa.” Kunenge alisema.