Serikali yanunua gari la zimamoto la kisasa Chalinze

Imewekwa: August 21st, 2023

Naibu Waziri wa Nchi Ofisi ya Rais Menejimenti yang Utumishi wa Umma na Utumishi Bora,Mheshimiwa Ridhiwani Kikwete amezindua Rasmi gari la zimamoto Leo lililonunuliwa na Serikali kwa ajili ya matumizi ya kuzima moto na uokoaji mbalimbali pindi kunapotokea majanga katika halamashauri ya wilaya ya Chalinze na maeneo jirani na halmashauri hiyo.

Akizindua matumizi ya gari hilo aliishukuru serikali ya awamu ya sita chini ya uongozi wa Dkt Samia Suluhu Hassan kwa kuwajali wananchi wa Chalinze na kuwapatia gari la kujikinga na majanga mbalimbali yanayoweza kutokea kwa wananchi wa Chalinze.

Aidha Mheshimiwa Ridhiwani baada ya uzinduzi wa gari hilo aliwataka wananchi kutumia vema namba za simu walizopewa kwa ajili ya kutoa taarifa mara panapotokea majanga ya moto na majanga mengineyo yanayoweza kutokea katika halmashauri ya Chalinze.

Naye Mwenyekiti wa Halmashauri ya wilaya ya Chalinze Hasani Mwinyikondo alitoa pongezi za dhati kwa Rais wa Jamhuri ya Muungano wa Tanzania Dkt Samia Suluhu Hassan kwa wema wake na upendo kwa wananchi wa Chalinze na watanzania kwa ujumla kwa matendo makuu anayoyafanya katika kutekeleza Ilani ya Chama cha Mapinduzi kwa kuhakikisha kuwa watanzania wanaishi kwa amani na utulivu.

Kwa upande wake Diwani wa kata ya Bwilingu Mheshimiwa Nassa Karama ametoa shukrani zake za dhati kwa niaba ya wananchi wa kata ya Bwilingu kwa serikali kununua gari la zimamoto katika halmashauri ya wilaya ya Chalinze,kwani Bwilingu ndiyo wanufaika wa kwanza na gari hilo.