Serikali yatangaza neema kwa wakulima wa zao la pamba Chalinze

Imewekwa: October 30th, 2024

Na John Mlyambate 

*Chalinze, Tanzania* – Serikali kupitia Bodi ya Pamba imetangaza msaada mkubwa kwa wakulima wa pamba katika Halmashauri ya Chalinze, ikiwa ni sehemu ya juhudi za kuimarisha zao hilo katika kanda ya mashariki. Tangazo hilo lilitolewa na Balozi wa Zao la Pamba, Mheshimiwa Aggrey Mwanri, alipokuwa akizungumza na wananchi kupitia kituo cha redio cha Chalinze FM leo.

Mheshimiwa Mwanri amesema kuwa katika msimu mpya wa kilimo unaoanza Novemba 2024, Serikali ya Awamu ya Sita chini ya Rais Dkt. Samia Suluhu Hassan itatoa mbegu, dawa, na mabomba ya kupulizia bure kwa wakulima wa pamba. Mpango huu unalenga kuongeza uzalishaji na kuwasaidia wakulima wa pamba katika maeneo ya Chalinze na kanda ya mashariki kwa ujumla.

Akizungumza zaidi, Mwanri amewataka vijana kuchangamkia fursa hiyo kwa kuzalisha pamba kwa wingi kutokana na upatikanaji wa pembejeo bure na uhakika wa soko. Ameeleza kuwa Bodi ya Pamba tayari imepata wanunuzi wa kuaminika ambao wataleta soko lenye uhakika kwa wakulima wa pamba.

Kwa upande wake, Mwakilishi wa kampuni ya ununuzi wa pamba ya Bens, Bwana Essau Mwalukasa, ambaye kampuni yake inajenga kiwanda cha kuchambua pamba katika Wilaya ya Mvomero, Morogoro, ameahidi kwamba kampuni yake iko tayari kununua pamba yote itakayozalishwa na wakulima wa Chalinze. Amehimiza wakulima waongeze uzalishaji ili kuhakikisha wana soko thabiti.

Aidha, Mkuu wa Divisheni ya Kilimo, Mifugo na Uvuvi katika Halmashauri ya Chalinze, Bwana Jovin Bararata, kwa niaba ya Mkurugenzi Mtendaji wa Halmashauri, ameishukuru Serikali kwa juhudi zake za kuweka mazingira rafiki kwa wakulima, ikiwemo upatikanaji wa pembejeo bure na soko la uhakika kwa wakulima wa pamba.

Hatua hii inatarajiwa kuinua uchumi wa wakulima wa pamba na kuchangia maendeleo ya kilimo katika wilaya ya Chalinze na maeneo jirani.