Shule Mpya ya Sekondari yajengwa Chalinze

Imewekwa: February 10th, 2020

     Na John Mlyambate 

Halmashauri ya wilaya ya Chalinze katika kukabiliana na uhaba wa vyumba vya madarasa kwa wanafunzi waliofaulu kuanza kidato cha kwanza mwaka 2020 wapatao 270 imeanzisha ujenzi wa shule mpya ya sekondari kwa kuanza kujenga vyumba vitano vya madarasa na vyoo ambavyo vitawawezesha wanafunzi hao kuendelea na masomo.

Shule hiyo inajengwa katika kitongoji cha Chahua kilichoko katika mamlaka ya mji mdogo wa Chalinze,ujenzi huo unajengwa kwa kutumia mapato ya ndani ya halmashauri yenye thamani ya fedha za kitanzania milioni 112. Kiasi hicho cha fedha kitatumika kujenga vyumba vitano vya madarasa,ofisi mbili za walimu na vyoo vya walimu

Kwa mujibu wa Mhandisi wa halmashauri ya Chalinze John Chizima akitoa maelezo ya kwa kamati ya Elimu afya na Maji ilipotembelea katika mradi huo ili kuona maendeleo ya mradi aliihakikishia kamati hiyo kuwa ifikapo Machi 10 mwaka huu 2020 majengo yatakuwa tayari na wanafunzi watakuwa wanasoma.”Kwa hali ilivyo na tuliyonayo tunategemea tukamilishe kazi hii mapema iwezekanavyo na wanafunzi waanze kuyatumia Kwani vifaa vyote vipo.” Chizima alisema.

Naye Afisa Elimu Sekondari,Mwalimu Timothy Bernard aliieleza kamati ya Huduma za Jamii kuwa,kwa sasa wanafunzi wapatao 270 wako katika shule ya sekondari ya Chalinze ambako wanasoma kwa muda wakisubiri kukamilika kwa majengo mapya ya shule ya sekondari ya Chahua ambako walichaguliwa na kuwataka kamati ya ujenzi na mafundi kufanya kazi kwa bidii na weledi ili kukamilisha kwa wakati na kupunguza msongamano katika shule mama ya Chalinze.

Kwa upande wake Mwenyekiti wa kamati ya Huduma za Jamii Mheshimiwa Malota Hussein pamoja na wajumbe wa Kamati hiyo walifurahishwa na namna unavyotekelezwa mradi na kuwapongeza wasimamizi wa mradi huo na kuwataka kuongeza kasi ya ujenzi huo ili wanafunzi waanze kusoma mara moja,Malota katika ukaguzi wa miradi ya Elimu alisema Halmashauri yetu katika kuhakikisha wanafunzi wote wanaochaguliwa kujiunga kidato cha kwanza tumedhamiria kuongeza vyumba vya madarasa kila mwaka kutokana na mapato ya ndani ili kummunga mkono Rais Magufuli kauli mbiu yake ya Elimu Bure kwa kila mtoto wa kitanzania Kwa kuweka miundombinu rafiki ya Elimu.

Malota aliongezea kwa kusema pamoja na kuanzisha shule hii lakini pia mwaka jana tumeanzisha shule nyingine ya sekondari katika mamlaka ya mji mdogo  Chalinze katika kitongoji cha Pingo,ambayo ni shule ya sekondari ya Pera. Shule hii nayo tumeipatia fedha za kitanzania milioni 104. Milioni 64 kwa ajili ya ujenzi wa maabara na milioni 40 kwa ajili ya ujenzi wa vyumba viwili vya madarasa.