Shule ya Mtakatifu Alphonsa Mfano wa Kuigwa Chalinze

Imewekwa: July 23rd, 2022

Mwenyekiti wa Halmashauri ya wilaya ya Chalinze Mheshimiwa Hassani Mwinyikondo azitaka shule za Msingi za Serikali kuiga mazuri ya Shule ya Msingi ya Mtakatifu Alphonsa iliyopo katika kitongoji cha Msolwa kata ya Bwilingu.

Mwinyikondo ameyasema hayo leo katika mahafali ya kuhitimu wanafunzi wa darasa la saba katika Shule hiyo alipokuwa akihutubia kama mgeni rasmi. “Naupongeza uongozi wa Shule hii ya kanisa kwa matokeo mazuri mnayopata kila mwaka na kuibeba Halmashauri kutokana na ufaulu mzuri wa wanafunzi wanaosoma hapa,natamani na shule za Serikali zifanye vizuri kama inavyofanya shule hii.” Mwinyikondo alisema.

Shule ya Mtakatifu Alphonsa ni Shule ya kanisa Katoliki chini ya Masista wa Mtakatifu Alphonsa iliyoanzishwa mwaka 2012 na kupata usajili wa Wizara ya Elimu na kutoa wahitimu wa darasa la saba kwa awamu ya kwanza mwaka 2020.

Katika Mahafali hiyo   viongozi mbalimbali walihudhuria walioongozwa na Mwenyekiti wa Halmashauri ya Chalinze ambao ni Mkurugenzi wa Halmashauri ya Chalinze,Bwana Ramadhani Possi,Kamanda wa Polisi wilaya ya Chalinze Bwana Hussein Mdoe,Afisa Mipango wa Halmashauri,Bwana Shambani Millao na Diwani wa kata ya Bwilingu Mheshimiwa Nassa Karama  na wazazi wa wanafunzi wahitimu.

Mahafali hiyo ilifana kwa kuwa na burudani mbalimbali zilizo andaliwa na wanafunzi wahitimu na wanaoendelea kama nyimbo ngonjera,maigizo sarakasi na michezo ya skauti. Burudani hizi zilionesha ni jinsi gani Shule hiyo inafundisha taaluma na kuibua vipawa mbalimbali walivyo navyo watoto na kuipa ubora sitahiki.

Mgeni rasmi katika mahafali hiyo aliweza kufanya shughuli mbalimbali kama kutoa kutoa zawadi kwa wanafunzi bora kwa masomo yote,zawadi kwa mwanafunzi bora kwa masomo yote na  zawadi kwa walimu bora walifaulisha wanafunzi kwa ufaulu wa juu kwa masomo wanayofundisha kama motisha kwa kazi nzuri waliyoifanya walimu hao.

Mheshimiwa Mwinyikondo alihitimisha kwa kutoa vyeti vya kuhitimu kwa wahitimu na kuwatakia mafanikio mema katika mitihani yao ya taifa itakayofanyika hivi karibuni  na kutoa wito kwa shule za Serikali kuwa na utaratibu wa motisha kwa walimu na wanafunzi ili kuamusha ari ya kujifunza kwa walimu na wanafunzi.

Kwa upande wake Mkurugenzi Mtendaji wa Halmashauri ya Chalinze Bwana Ramadhani Possi aliupongeza uongozi wa Shule pamoja na bodi ya Shule hiyo chini ya Mwenyekiti wa Bodi hiyo Mwl.Merickzedek Komba kwa kazi nzuri inayofanyika katika shule hiyo ya kuinua ufaulu wa wanafunzi kitaaluma na kuahidi kuendelea kutoa ushirikiano pindi Shule inapohitaji misaada mbalimbali husan misaada ya kitaalam na ushauri.

Naye kamanda wa polisi wilaya ya Chalinze Bwana Hussein Mdoe aliupongeza uongozi wa shule kwa jinsi wanavyowaandaa vijana katika masomo na ukakamavu hususan katika nyanja ya skauti na kutoa nasaha kwa vijana kutojihusisha na uhalifu katika kipindi watakacho kuwa nyumbani wakisubiri matokeo,badala yake waendelee kuwa waadilifu kama walivyofundishwa wakiwa shuleni.

Mwenyekiti wa Bodi yaShule ,Mwl. Komba kwa niaba ya Jumuiya nzima ya Shule ya Mtakatifu Alphonsa aliwapongeza wageni wote walioambatana na Mgeni rasmi,wazazi,walimu na wanafunzi kwa kushiriki kikamilifu katika shughuli ya mahafali na kuwaomba waendelee kuwa moyo wa upendo kwa jumuiya ya Mtakatifu Alphonsa siku zote.