Taasisi isiyo ya Kiserikali ya Alboraq Association yamwaga misaada Chalinze

Imewekwa: May 17th, 2024

Taasisi isiyokuwa ya kiserikali ya Alboraq Association inayojishughulisha na utoaji wa misaada ya kibinadamu kwa wasiojiweza na wenye mahitaji maalum imetoa misaada ya viti mwendo 17 na vifaa vya usikivu 35 kwa watoto wenye mahitaji maaalum wa shule ya msingi Chalinze. Vifaa hivyo vitawasaidia wanafunzi wa shule hiyo katika tendo la kujifunza na kurahisisha tendo zima la ufundishaji.

Akikabidhi misaada hiyo Mwenyekiti wa Bodi ya Taasisi ya Alboraq Association, Bwana Rashed Afeef Watted aliahidi kuendelea kutoa misaada kwa watoto wenye mahitaji maalum ili kuwawezesha kupata elimu stahiki pamoja na changamoto zinazowakabili pasipo kizuizi chochote. Mwenyekiti wa Bodi aliahidi pia kuchimba kisima cha maji katika ofisi ya Mkurugenzi Mtendaji kwa ajili ya matumizi mbalimbali katika ofisi hiyo ya makao makuu ya halmashauri.

Naye Mwenyekiti wa halmashauri ya wilaya ya Chalinze,Mheshimiwa Hassani Mwinyikondo alipokea misaada hiyo kwa niaba ya Halmashauri na kuwashukuru wadau hao kwa msaada adhimu ambao utakuwa ni ukombozi kwa watoto wenye mahitaji maalum katika halmashauri ya Chalinze na kuwaomba wapanue wigo wa misaada na kusaidia katika huduma mbalimbali za kijamii.

Baada ya mapokezi ya misaada hiyo kwa ajili ya mahitaji ya watoto wenye mahitaji maalum,Mwenyekiti wa halmashauri alikabidhi cheti cha kutambua misaada hiyo kwa Mwenyekiti wa Bodi mbele ya mkutano wa Baraza la Madiwani kwa kazi nzuri iliyofanywa na Taasisi hiyo.