TANESCO yaunga Mkono jitihada za Mhe.Rais Samia Suluhu Hassan kuhusu Matumizi ya

Imewekwa: January 26th, 2026

Shirika la Umeme Tanzania (TANESCO) limeunga mkono jitihada za Rais wa Jamhuri ya Muungano wa Tanzania, Mheshimiwa Samia Suluhu Hassan, katika kuhamasisha matumizi ya nishati safi, hususani kwa matumizi ya nyumbani.

Hayo yameelezwa leo,   Januari 26,2026, katika studio za Chalinze FM kwenye kipindi Cha Amka na Chalinze,  ikiwa ni maadhimisho ya Siku ya Nishati Safi ya Kupikia.

Akizungumza katika kipindi hicho, Afisa Mahusiano na Huduma kwa Wateja wa TANESCO, Bi. Ester Msaki, amesema matumizi ya nishati safi yana umuhimu mkubwa kwa jamii kwani hayana madhara kwa binadamu na viumbe wengine.

Amesema matumizi ya nishati safi ya kupikia yatasaidia kupunguza matatizo ya kiafya yanayoikumba jamii, ambayo yamekuwa yakisababishwa na matumizi ya kuni na mkaa yanayozalisha moshi unaodhuru afya.

Aidha, Bi. Msaki ameeleza kuwa kutokana na umuhimu wa nishati safi, TANESCO imekuwa ikitoa elimu kwa wananchi waishio vijijini na mijini kuhusu matumizi sahihi ya nishati hiyo. Pia shirika hilo limeanzisha mkakati wa kuwakopesha wananchi vifaa vya kupikia vinavyotumia umeme kidogo kwa gharama nafuu, ambapo wananchiwa watalipa kwa awamu hadi kukamilisha malipo.

Amefafanua kuwa vifaa hivyo ni majiko ya umeme yaliyokaguliwa na kuhakikiwa, yakiwa salama kwa watumiaji na yanayotumia umeme kwa kiwango kidogo. Lengo ni kupunguza gharama za matumizi ya nishati pamoja na kulinda afya za wananchi.

Mwisho, Bi. Ester Msaki ametoa wito kwa wananchi kumuunga mkono Rais Samia Suluhu Hassan katika kampeni ya matumizi ya nishati safi, akisisitiza kuwa suala hilo si la kisiasa bali ni la kiafya na maendeleo ya Taifa.

Katika tukio hilo, Bi. Msaki aliambatana na Msimamizi wa Ufundi wa TANESCO Chalinze, Bw. Eliezer Minja, pamoja na Afisa Uhusiano wa TANESCO Chalinze, Bi. Cresencia Muhoja.