Tatizo la maji chalinze kuwa historia

Imewekwa: September 22nd, 2021

Moja ya malengo ya ziara ya mkuu wa Mkoa wa Pwani Mhe. Abubakari Kunenge  katika Halmashauri ya Wilaya ya Chalinze ni kusikiliza kero za wananchi wa Chalinze na kuzitatua.

Na katika kuskiliza kero hizo, moja ya kero kubwa ni uhaba wa maji kwenye maeneo mengi ya Chalinze ambapo katika kulitolea ufafanuzi suala hilo Mkuu wa Mkoa Mhe. Abubakari Kunenge alimtaka Meneja DAWASA Pwani  Eng. Paschal Fumbuka kulitolea ufafanuzi suala hilo kwa wananchi na meneja huyo alisema

“Ni kweli tuna uhaba wa maji kwenye baadhi ya maeneo kutokana na hapo awali Chalinze ilikuwa inategemea chanzo Kimoja cha maji ambacho ni mto Wami, Chanzo hicho kilikuwa kinauwezo wa uzalisha wa maji Kiasi cha Mita za ujazo 7200 wakati mahitaji Halisi ni Mita za ujazo 15000 kusababisha kuzidiwa kwa mradi wa maji Wami, Alisema Eng. Fumbuka.

 Kupata suluhisho la changamoto hiyo serikali ilitenga fedha kwa ajili ya Mradi Mkubwa wa Maji wa Mlandizi – Mboga  na mradi huu umekwisha anza unategemea kukamilika mapema Mwenzi Octoba na tatizo la maji Chalinze litabaki Historia, hivyo tunamalizia uingizaji wa maji kutoka mlandizi ambao utasaidia kuongeza ujazo wa maji na kufanya wanachalinze kupata maji muda wote”. Aliongeza Eng. Fumbuka.

Hata hivyo Mheshimiwa Mkuu wa Mkoa wa Pwani aliwahakikishia wananchi kuwa suala la kero ya maji Chalinze na Mkoa wa Pwani litakuwa historia kwani dhamira ya Serikali ya Rais wa Jamhuri ya Muungano wa Tanzania inayoongozwa na  Mhe. Samia Suluhu Hassan ni kumaliza kero hiyo    

 “Suala la maji Chalinze litakuwa historia kwani DAWASA wametolea ufafanuzi suala hilo na nitoe maelekezo kwa DAWASA kuhakikisha Vioksi vya maji vinakamilika ili wananchi waweze kupata maji kwa gharama ndogo sana na muda huu nitakwenda kukagua mradi huo wa maji uliopo Msoga ili kuona maendeleo ya mradi huo muhimu kwa maslahi ya wanachalinze na Taifa kwa ujumla na hiyo ndio dhamira ya Serikali inayoongozwa na Rais wetu Mhe. Samia Suluhu Hassan”. Alisema Mhe. Kunenge.

Ziara hiyo ya mkuu wa Mkoa wa Pwani imelenga kusikiliza kero za wananchi wa Chalinze, kutembelea miradi mbalimbali na kuweka mawe ya msingi kwenye miradi.