TRA yatambulisha Mfumo wa Kielektroniki wa Usimamizi wa Kodi (IDRAS)

Imewekwa: January 29th, 2026

Mamlaka ya Mapato Tanzania (TRA) imetoa mafunzo kuhusu matumizi ya mfumo wa kielektroniki wa kusimamia na kukusanya kodi za ndani ya nchi unaojulikana kama Integrated Domestic Revenue Administration System (IDRAS).

Akielezea mfumo huo, Afisa Muandamizi wa Usimamizi wa Kodi wa TRA, Musa Otieno, amesema kuwa IDRAS umeundwa kuchukua nafasi ya mifumo mbalimbali inayotumika kwa sasa ndani ya mamlaka hiyo. Amesema mfumo huo utapunguza matumizi ya makaratasi na kuwezesha shughuli zote zinazohusiana na usimamizi wa kodi za ndani kufanyika kwa njia ya kielektroniki.

TRA imeeleza kuwa lengo kuu la kuanzisha mfumo wa IDRAS ni kuboresha huduma za usimamizi wa kodi za ndani, kuongeza ufanisi katika ukusanyaji wa mapato, pamoja na kuleta urahisi kwa walipakodi na wadau wengine.

Kwa upande wake, Afisa Kodi Ajira Ismail, amesema mfumo wa IDRAS utatoa huduma mbalimbali ikiwemo usajili na uboreshaji wa taarifa za walipakodi, uwasilishaji wa matamko ya kodi (tax returns), makadirio na utozaji wa kodi, malipo ya kodi kwa njia ya kielektroniki, ufuatiliaji wa madeni ya kodi, pamoja na upatikanaji wa ripoti na takwimu za mapato.

Aidha, huduma nyingine zitakazopatikana kupitia mfumo huo ni maombi ya leseni mbalimbali, maombi ya marejesho ya kodi (tax refunds), maombi ya mapingamizi na rufaa za maamuzi ya kikodi (objections and appeals), maombi ya msamaha wa riba na adhabu, pamoja na huduma nyingine za usimamizi wa kodi.

Naye Meneja wa TRA Chalinze, Proches Richard Kahema, amesema kuwa TRA imewawezesha walipakodi kufikia mfumo huo wa majaribio ili waweze kujifunza na kuuzoea kabla ya kuanza kutumika rasmi.

Ameongeza kuwa walipakodi na watumishi wengine wanahimizwa kujiandaa kikamilifu kwa kupata uelewa wa matumizi ya mfumo huo kupitia mafunzo na taarifa mbalimbali zinazotolewa na TRA. Pia amewataka walipakodi kutumia kipindi hiki cha majaribio kuhakiki na kusahihisha taarifa zao pamoja na za wawakilishi wao ili kuepuka usumbufu pindi mfumo utakapoanza kutumika rasmi.