Tumebaini Wafugaji Wavamizi 78-DC Kawawa

Imewekwa: August 30th, 2018

Mkuu wa wilaya ya Bagamoyo,Mheshimiwa Zainabu Kawawa amekutana na wananchi wa kijiji cha Pongwe Mnazi ili kutoa mrejesho wa hatua alizozichukua dhidi ya wafugaji wavamizi wanaoingia katika kijiji hicho na kuharibu amani ya wakazi wa kijiji hicho,"Kama wilaya tumeanza kuchukua hatua kwa wafugaji wavamizi wanaohatarisha amani ya wananchi, tumekwisha wabaini wafugaji wavamizi 78 vijiji vya Pongwe Kiona na Pongwe Mnazi hivyo tunaendelea na hatua mbalimbali kuhakikisha wanatoweka katika maeneo hayo."Mkuu wa wilaya alisema.

Mheshimiwa Kawawa amewataka wananchi kutoa ushirikiano wa hali ya juu katika mapambano dhidi ya wafugaji wanaoingia katika vijiji vya Halmashauri ya Chalinze bila utaratibu wa kisheria kwa kutoa taarifa ofisi ya Mkuu wa wilaya kwa hatua zaidi.

Aidha amewaonya watendaji wa vijiji,kata na wenyeviti wa vijiji wanaotoa vibali na kuwakaribisha wafugaji wavamizi kuingia katika vijiji bila kufuata taratibu za kisheria na kuahidi kuwachukulia hatua za kisheria

Kawawa aliendelea kusisitiza na kuziagiza Halmashauri za vijiji kukaa na kuainisha maeneo yanayofaa kwa ufugaji na kuona kiasi cha mifugo kinachotakiwa kwa kila kaya,hii ni operesheni maalum itakayoendelea kwa wilaya nzima ili kuondokana na migogoro na hatimaye kulinda tunu tuliyoachiwa na waasisi wetu ambayo ni amani. Mkuu wa wilaya alifafanua.

Kwa upande wake Afisa Ardhi na maliasili Bi Zaina Kijazi alisema eneo hili la Pongwemnazi halifai na halitoshi kwa shughul za ufugaji hivyo hakutakiwi kufanya shughuli za ufugaji mpaka hapo mpango wa matumizi bora ya Ardhi utakapopangwa na Halmashauri.

Naye Diwani wa kata ya Kimange  Hussein Hading'oka alimshukuru Mkuu wa wilaya kwa hatua za haraka alizozichukua katika kutokomeza Migogoro ya wakulima na wafugaji kwa muda mfupi tangu aanze Kazi katika wilaya ya Bagamoyo na kuahidi kutoa ushirikiano wa kina katika kutokomeza vitendo viovu vinavyofanywa na wafugaji dhidi ya wakulima.

Naye Mohammed Mkola ,Mzee maarufu alizungumza kwa niaba ya wananchi wa kijiji cha Pongwe Mnazi kwa kuiomba ofisi ya mkurugenzi mtendaji kuleta mtendaji wa kijiji  kwani mpaka sasa kijiji hakina mtendaji na hivyo shughuli za kijiji kutotekelezeka kwa ufasaha.

Mkuu wa wilaya ya Bagamoyo Bi Zainabu Kawawa alitoa maagizo kwa Mkurugenzi mtendaji wa Halmashauri kupeleka mtendaji Mara moja na Mkurugenzi aliahidi kutekeleza agizo hilo