Upungufu wa Madawati kuwa Historia Chalinze

Imewekwa: December 11th, 2020

Mkuu wa Mkoa wa Pwani Mhandisi Evarist Ndikilo amekabidhi viti 221,meza 221,na madawati 305 leo katika shule za msingi na sekondari katika Halmashauri ya Chalinze, Mheshimiwa Ndikilo katika hotuba yake katika Mkutano uliofanyika katika kijiji cha Miono,alifurahishwa na uongozi wa Halmashauri ya Chalinze kwa jitihada za makusudi za kutekeleza maelekezo ya Waziri Mkuu katika kukamilisha utengenezaji wa madawati kwa shule za msingi 106 na shule za sekondari 21.

Mhandisi Ndikilo ameupongeza uongozi wa wilaya ya Bagamoyo na Halmashauri ya Chalinze kwa jinsi walivyojipanga kutengeneza madawati hayo na kukamilisha kwa wakati."Nakupongeza Mkuu wa Wilaya, Mkurugenzi Mtendaji wa Halmashauri,wakuu wa Idara wa Chalinze kwa jinsi mlivyojipanga vizuri kutekeleza maagizo ya Waziri Mkuu wa Jamhuri ya Muungano wa Tanzania ya kutengeneza madawati kwa ajili ya Wanafunzi wote wa sekondari na shule za msingi Hongereni sana kwa kazi nzuri."Ndikilo alisema.

Pamoja na pongezi hizo Mhandisi Ndikilo aliwataka Wanafunzi kusoma kwa bidii na kupata ushindi mzuri kwani mazingira ya kujifunzia ni rafiki kwao na kuwataka wazazi kuwasimamia watoto wao ili Elimu bora itakayowasaidia Katika maisha yao kwani urithi pekee na wenye tija ni Elimu na si vinginevyo.

Mkuu wa Wilaya ya Bagamoyo,Bi Zainabu Kawawa akitoa taarifa ya utekelezaji wa maagizo ya Waziri Mkuu kwa Mkuu wa Mkoa wa Pwani Mhandisi Evarist Ndikilo. Kawawa alisema Katika Halmashauri ya Chalinze suala la madawati litabaki kuwa historia,kwani shule zote za msingi 106 na shule za sekondari 21 zina madawati na hakuna mwanafunzi anayekaa chini. Utekelezaji wa zoezi hili ulianza mwezi Julai mwaka huu na leo tunahitimisha zoezi hili kwa kumkabidhi Mkuu wa Mkoa madawati ili aweze kugawa katika shule za msingi na sekondari zilizokuwa bado zinauhitaji.

Mkuu wa wilaya ya Bagamoyo alimpongeza Mkurugenzi Mtendaji wa Halmashauri ya Chalinze Bwana Ramadhani Possi kwa jitihada anazozifanya kutekeleza maelekezo ya serikali kutokana na mapato ya ndani, sanjari na kufanya kazi kwa kushirikiana na wakuu wa Idara na Vitengo katika Halmashauri yake."Hongera Sana Mkurugenzi na Menejimenti yako kwa kujipanga vizuri na kutatua kero mbalimbali za wananchi." Kawawa alipongeza.

Kwa upande wake Mbunge wa Jimbo la Chalinze Mheshimiwa Ridhiwani Kikwete alimshukuru Mkuu wa Mkoa wa Pwani Mhandisi Evarist Ndikilo kwa jitihada zake katika kuhamasisha utekelezaji wa maelekezo ya serikali kwa wakati hususan Ujenzi wa miundombinu ya Elimu,kutokana na usimamizi bora leo Chalinze hatuna upungufu wa madawati kwa shule zetu zote za msingi na sekondari."Tunamshukuru sana Mkuu wetu wa Mkoa." Ridhiwani alisema.

Aidha Mheshimiwa Kikwete katika kuunga mkono jitihada zinazofanywa na Halmashauri katika kuboresha mazingira ya kufundishia na kujifunzia alitoa jumla ya fedha za kitanzania Milioni 3.6 ili ziweze kutengeneza madawati kwa ajili ya wanafunzi,na kutokana na mchango huo inapelekea Halmashauri ya Chalinze kumaliza kabisa tatizo la upungufu wa madawati katika shule zote.

Kwa upande wa Wanafunzi wa shule ya sekondari ya Kikaro waliotoa shukrani zao kwa Halmashauri ya Chalinze kupitia nyimbo walizoandaa zilizokuwa na maudhui ya kuipongeza serikali kwa kuboresha miundombinu ya Elimu.Waliimba nyimbo hizo mbele ya Mgeni Rasmi,ambaye ni Mkuu wa Mkoa wa Pwani Mhandisi Evarist Ndikilo na kuipongeza serikali kwa mipango yenye tija.