Uzinduzi wa Chanjo ya Surua, Lubela na Polio - Chalinze

Imewekwa: October 22nd, 2019

Katibu Tawala wa Wilaya ya Bagamoyo Bi. Kasilida Mgeni amezindua rasmi zoezi la Chanjo ya Surua na Lubela pamoja na  sindano za polio kiwilaya katika kata ya Msata jana ikiwa na kaulimbiu Chanjo ni kinga kwa pamoja tuwakinge. Uzinduzi huo ulifanyika  zahanati ya Msata iliyopo kijiji cha Msata ikiwa ni kampeni ya nchi nzima ya kutoa Chanjo kwa jamii hasa watoto kuanzia umri wa miezi 9 mpaka miaka 5

Mara baada ya Mganga mkuu wa Wilaya Dkt.Ernest Kyungu kutoa taarifa fupi juu ya jitihada zinazofanyika ili kufanikisha zoezi zima la utoaji wa Chanjo ndipo mgeni rasmi Bi.Kasilida Mgeni akatoa neno kwa  wananchi pamoja na viongozi waliohudhuria hafla hiyo ya Uzinduzi wa chanjo.

‘’Nawaomba ndugu wananchi wa Kata ya Msata na Halmashauri ya Chalinze kwa ujumla  mjitokeze kwa wingi ili kushiriki kikamilifu zoezi hili kwa kuwapeleka watoto wenu kwenye zahanati inayotoa chanjo ili kuwakinga watoto na magonjwa ya polio, Lubela na Surua.’’Alisema Bi.Kasilida.

Hata hivyo aliongeza kwa kusema..

‘’Nahimiza kuwepo na ushirikiano  baina ya wazazi yaani baba na mama katika kushiriki shughuli hizi za chanjo kwani suala hili si la mama peke yake bali hata kina baba wanatakiwa kuwa mstari wa mbele katika kuhimiza na kutekeleza jambo hili hivyo  wazazi mshirikiane katika shuguli zote za kiafya zinazowahusu watoto wenu zitakazojitokeza hapo mbeleni’’

Naye Mkurugenzi mtendaji wa Halmashauri ya Chalinze Bi. Amina Kiwanuka ametoa pongezi kwa wananchi na kusema..

‘’Nawapongeza wale wote mliojitokeza na kushiriki vyema katika kuleta watoto wenu ili kupata chanjo kwani chanjo ni kinga kwa watoto ambao ndio taifa la kesho hivyo basi bado nasisistiza  muwape taarifa na walioko majumbani kujitokeza kwa wingi ili kufanikisha jambo hili na kuzikinga afya za watoto wetu.’’

Aidha Diwani wa Kata ya Msata Mh.Selestine Semiono aliwataka wananchi kushirikiana vyema na watoa chanzo kwa kuwapa ushirikiano na kujitokeza kwa wingi ili kuwapeleka watoto wao kupata Chanjo nakufanya Chalinze iwe mstari wa mbele katika masuala ya afya.

Kwa niaba ya wananchi wa Kata ya Msata Bi.Mwajuma Mbwana  alitoa shukrani za dhati kwa kusema ‘Tunaishukuru Serikali yetu na Halmashauri yetu kwa ujumla kwa kuwezesha upatikanaji wa Chanjo hizi kwani zitasaidia kuondoa magonjwa haya katika jamii zetu hasa kwa watoto wetu.’

Ikumbukwe kuwa kampeni za utoaji Chanjo ilianza mnamo tarehe 17/10/2019 na kufikia tamati siku ya Jumatatu ya tarehe 21/10/2019(jana) lakini zoezi hili litakua ni endelevu kwa siku zote katika vituo vya Afya zahanati na Hospitali