Mwenyekiti wa Halmashauri ya Wilaya ya Chalinze afanya ziara katika kata ya Kimange

Imewekwa: August 31st, 2019

Mwenyekiti wa Halmashauri ya Wilaya ya Chalinze Mheshimiwa Saidi Omary Zikatimu amefanya ziara katika kata ya Kimange hivi karibuni ikiwa ni pamoja na kujionea na kukagua miradi ya maendeleo yanayofanywa katika kata hiyo.

Akiwa kwenye ziara hiyo Mh.Said Zikatimu  ameweka jiwe la msingi katika mradi wa Ujenzi wa vyumba 2 vya madarasa unaojengwa katika Shule ya Msingi PongweMnazi katika kata hiyo wenye gharama ya Tsh.Milioni 20.5 na Ujenzi wa Nyumba 1 ya mwalimu yenye thamani ya kiasi cha Tsh.milioni 11na  kutoa pongezi kwa Walimu , Kamati ya shule na Wananchi kwa kushirikiana vyema kwa kusimamia na  kufikia hatua nzuri ya ujenzi.

“Nawapongeza sana Walimu, Kamati ya shule na Wananchi kwa ushirikiano wenu katika  kusimamia vyema utekelezaji wa mradi wa ujenzi huu mpaka kufikia hatua nzuri naamini mradi huu utakapomalizika utaondoa adha ya upungufu wa madarasa katika shule hii na kufanya wanafunzi kusoma kwa bidii na kufikia malengo yao.’’ Alisema Mh. Zikatimu.

Hata hivyo  Mheshimiwa Mwenyekiti ameongezea kwa kusema..

“ miradi hii ni miradi endelevu kwani fedha zimetengwa kwaajili ya ujenzi wa shule kadhaa zikiwemo kiasi cha Tsh.milioni 346 kwaajili ya ujenzi wa baadhi ya shule za msingi na kiasi cha Tsh.Milioni 579 kwaajili ya ujenzi wa shule za sekondari ukiwemo mradi wa Ujenzi wa Shule ya Sekondari Chahua.”

Kwa upande wa walimu na wanafunzi wamemshukuru Mh.Zikatimu kwa kutilia mkazo katika ujenzi huo wa miundombinu ya elimu katika Shule hiyo.

“Tuanaishukuru sana serikali yetu kwa kuweza kutujengea vyumba vya madarasa na itatusaidia kusoma bila kuwekeana zamu ya kuingia darasani ambapo itakuwa ni tofauti na mwanzoni kwani tulikuwa tunaingia darasani kwa kupangiana zamu.’’Alisema ,Karim Zamoyoni Ally .

Moja ya Jukumu la Serikali ni kuhakikisha kuwa Miundombinu ya Elimu inasimamiwa vyema nchini kupitia watendaji wake ili kuwepo na upatikanaji wa elimu bora nchini kwa kuhakikisha Ujenzi wa Madarasa,maabara,nyumba za walimu, na uwepo wa wataalamu wa mafunzo  yaani walimu  ambapo inapelekea kuwa na Taifa lenye maendeleo.