Vibanda 136 vya kufanyia Biashara vyaanza kujengwa Chalinze

Imewekwa: November 5th, 2022

Halmashauri ya wilaya ya Chalinze imeanza ujenzi wa vibanda 136 kuzunguka soko kuu la halmashauri la Bwilingu,ili kuwawezesha wajasiriamali na wafanyabiashara katika halmashauri ya Chalinze kufanya biashara katika vibanda hivyo na ndani ya soko. Ujenzi huo umeanza leo katika soko la Bwilingu na unategemea kukamilika ndani ya mwezi mmoja hadi mitatu ili wananchi waweze kuendelea na biashara kwa wakati.

Akitoa taarifa hiyo kwa vyombo vya habari Mwenyekiti wa Halmashauri ya Chalinze,Hassani Mwinyikondo aliahidi kuwa ujenzi huo utakamilika kwa wakati na utatumia muda mfupi kwani halmashauri imejipanga kuhakikisha kuwa vibanda hivyo vinakamilika kwa wakati na kuanza kutumika.

“Halmashauri tumejipanga kuhakikisha tunaweka mazingira rafiki kwa wajasiriamali kufanya biashara kwa kutumia miundombinu rafiki inayoandaliwa na halmashauri kwa misingi ya kuwakwamua wanachalinze kiuchumi.” Mwinyikondo alisema.

Naye Diwani wa kata ya Bwilingu, Mheshimiwa Nassa Karama kwa niaba ya wananchi wa Bwilingu alipongeza juhudi za halmashauri ya wilaya ya Chalinze kwa uamuzi wa kujenga vibanda zaidi ya 136 vitakavyotumika kwa biashara kuzunguka soko la Bwilingu.

“Vibanda hivi vinajengwa kwa kutumia mapato ya ndani ya halmashauri na utakuwa mradi utakaoiletea halmashauri mapato na hatimaye kuweza kutoa huduma za jamii zenye tija kwa wananchi kama afya ,elimu na maji.” Mheshimiwa Nassa alisema.

Kwa upande wake Mkurugenzi Mtendaji wa Halmashauri ya wilaya ya Chalinze,Bwana Ramadhani Possi  alisema ujenzi wa vibanda 136 kuzunguka soko la Bwilingu ni mwendelezo wa ujenzi wa soko kwa maana ya ujenzi awamu ya pili,ujenzi awamu ya kwanza ilikuwa ni soko lenyewe na kwa sasa tunaanza awamu ya pili ya ujenzi wa vibanda ambavyo vitatumika na wafanyabiashara ujenzi huu utatumia fedha za kitanzania milioni 748.

“ Tulichelewa kuanza awamu ya pili ili tukamilishe zoezi la kulipa fidia kwa wananchi waliokuwa wanaidai halmashauri,kwa kuwa hili la fidia liko mbioni kukamilika ndiyo maana tumeanza rasmi na tunatarajia kazi hii ikamilike ndani ya muda mfupi na vibanda kuanza kufanya kazi.” Possi alisema.

Aidha Kamanda wa polisi wilaya ya kipolisi Chalinze SSP Hussein Mdoe aliahidi kutoa ushirikiano wa hali na mali kuhakikisha kuwa amani inakuwa ya kutosha katika maeneo yote ya kufanyia biashara na wananchi watafanya biashara kwa amani na utulivu.

“Jeshi la polisi tupo tayari kuilinda amani na kuwahakikishia wananchi usalama katika maeneo yote ya kufanyia biashara muda wote.” SSP Mdoe alisema.