Vikundi vyenye sifa Chalinze vyatakiwa kufanya maombi ya mikopo kupitia wezesha Portal

Imewekwa: October 2nd, 2024

Na John Mlyambate

Vikundi mbalimbali vilivyopo ndani ya Halmashauri ya Wilaya ya Chalinze ambavyo vinakidhi vigezo, vimetakiwa kuwasilisha maombi yao ili kunufaika na mikopo kupitia mfumo wa kielektroniki wa Wezesha Portal. Hii ni fursa kwa vikundi vya wanawake, vijana, na watu wenye ulemavu ili kuimarisha shughuli zao za kujipatia kipato.

Mkurugenzi Mtendaji wa Halmashauri ya Chalinze, Bwana Ramadhan Possi, alitoa wito huu mnamo Septemba 30, 2024, wakati wa mahojiano maalum na kituo cha Redio Chalinze FM katika kipindi cha *Maskani ya Chalinze*. Kipindi hiki huruka kila Jumatatu hadi Ijumaa kuanzia saa 10:00 jioni hadi saa 12:00 jioni, ambapo alieleza utekelezaji wa tangazo la kufunguliwa kwa dirisha la utoaji wa mikopo hiyo.

Bwana Possi alibainisha kuwa hadi kufikia Agosti 31, 2024, Halmashauri ya Chalinze tayari imetenga jumla ya Shilingi Bilioni 1.864 kwa ajili ya mikopo kwa vikundi vya wanawake, vijana, na watu wenye ulemavu. Fedha hizi zimetengwa kwa lengo la kuwawezesha wananchi kujikwamua kiuchumi na kuimarisha kipato cha kaya zao.

Katika mahojiano hayo, Bwana Possi alieleza kuwa Serikali imefanya maboresho katika utoaji wa mikopo kwa kuongeza umri wa wanufaika wa kundi la vijana kutoka miaka 18 hadi 45, tofauti na awali ambapo umri ulikuwa kati ya miaka 18 na 35. Alisema kuwa mikopo hii haina riba yoyote, hivyo kuwa fursa bora kwa wananchi kuacha kukopa mikopo yenye masharti kandamizi.

Aidha, Mkurugenzi alifafanua kuwa kiwango cha mikopo kinachotolewa kinaanzia shilingi laki tano hadi shilingi milioni 150 kwa wajasiriamali wadogo na wa kati. Alitoa shukrani kwa wananchi kwa kuwa wavumilivu tangu kusitishwa kwa mikopo hiyo Aprili 14, 2023, kwa lengo la kuboresha mfumo wa utoaji wa mikopo.

Kwa upande wake, Mkuu wa Idara ya Maendeleo ya Jamii, Nyamayao Said Ally, alisisitiza kuwa vikundi vinavyotaka kukopeshwa vinapaswa kupitia mafunzo na kupata cheti cha utambuzi. Alisema vikundi vinaweza kupata msaada kutoka kwa watendaji wa kata na maafisa maendeleo ya jamii katika ofisi za kata ili kufanikisha maombi ya mikopo kwa njia bora na sahihi.

Serikali kupitia Waziri wa Nchi, Ofisi ya Rais Tawala za Mikoa na Serikali za Mitaa (OR-TAMISEMI), Mhe. Mohamed Mchengerwa, ilitoa tangazo la kufunguliwa kwa dirisha la utoaji wa mikopo kwa vikundi vya wanawake, vijana, na watu wenye ulemavu kuanzia Julai 2024, ikiwa ni sehemu ya jitihada za kukuza uchumi wa wananchi.