Viongozi Jimbo la Chalinze wafanya ziara kujionea uharibifu uliofanywa na Mvua ilioambatana na Upepo Kata ya Pera

Imewekwa: March 6th, 2021

Mh Ridhiwani Kikwete (Mbunge jimbo la Chalinze) akiongozana na Mwenyekiti wa Halmashauri Mh. Geofrey Kamugisha na Mkurugenzi Mtendaji wa Halmashauri ya Chalinze Ndugu: Ramadhani Possi, wamefanya ziara  na kuwatembelea  wakazi wa Kitongoji cha Pingo ambao nyumba zao zimebomolewa kwa upepo ulioambatana na mvua.

Wakiwa katika ziara hiyo Katani Pera, Viongozi hawa ambao ni nguzo ya Halmashauri ya Chalinze wameshuhudia uharibifu wa zaidi ya nyumba 30 ambazo zimeezuliwa paa kutokana na mvua iliyoambatana na upepo mkali, iliyonyesha katika maeneo hayo ya Pingo na maeneo mengine ya Halmashauri

Akizungumza baada ya kujionea athari hiyo iliosababishwa na mvua iliyoambatana na upepo mkali , Ridhiwani alisema kuwa wamepewa taarifa na uongozi wa Serikali ya kijiji kuhusiana na kadhia hiyo iliowapata.

"Tulijulishwa na uongozi wenu wa kijiji kuhusu kutokea kwa tukio hili, tumekuja tumejione hali halisi poleni sana kwa kadhia hii, tumeona yapo mambo yaliyo ndani ya uwezo wetu kama  Halmashauri tutayafanyiakazi, yaliyo juu yetu tutayawasilisha Ofisi ya Mkuu wa Wilaya ili kuona ni namna gani tunasaidiana" alisema Ridhiwani.

Nae Mwenyekiti wa Halmashauri Mh. Geofrey Kamugisha alisema kuwa wamefika kwa lengo la kuwapa pole kwa tukio hilo, huku akieleza kwamba wamejionea nyumba zaidi ya 30 zilizokumbwa na maafa hayo, ambapo ametoa  pole kwa waadhirika wote na kueleza kuwa wanakwenda kukaa kama uongozi ili kuona ni namna gani wanaweza kuungana nao katika kutafuta suluhu ya haraka.

"Kama viongozi wa Halmashauri na wataalamu wetu tutakwenda kukaa kuona ni namna gani tunavyoweza kushirikiana katika kusaidiana kwenye janga hili, tunawapa pole endeleeni kuwa watulivu Serikali yenu sikivu ikiongozya na Rais Dkt John Joseph Pombe Magufuli ipo pamoja nanyi wakati wote wa shida na raha," alisema Mh. Kamugisha.

Akizungumza katika  eneo lililopata madhara Mkurugenzi Mtendaji Ndugu: Ramadhani Possi alisema “licha ya kuona hali halisi, yupo tayari kupokea maelekezo ya viongozi  kisha kufanyia kazi mambo yaliondani ya uwezo wa Halmashauri ili kuona ni naamna gani watakavyochukua hatua za haraka katika kutafuta suluhu ya janga hilo.

Akizungumza mbele ya Viongozi waliotembelea  eneo lililoathirika na Mvua ya upepo kwa niaba ya Waathirika wote Bi. Mariam Salehe na Bw. Muhidini Rashid walimpongeza Mbunge na msafara wake kwa kufika eneo lililoadhirika na kuwafariji, huku wakiwaombea baraka katika uongozi wao ili waendelee kuwatumikia wana-Chalinze wote.

"Tunawaombea dua muendelea kuwatumikia wananchi usiku na mchana, kitendo chako Mbunge Ridhiwani kuambatana na viongozi wenzako kuja kutufariji kimetuongezea imani kwenu, tunawashukuru sana," alisema Mariamu.