Vishikwambi vyaanza kutumika Rasmi Chalinze

Imewekwa: January 20th, 2023

Halmashauri ya wilaya ya Chalinze kupitia mapato ya ndani ya Halmashauri imenunua vishikwambi(Tablets) vyenye thamani ya fedha za kitanzania Milioni 40.1 kwa ajili ya matumizi ya Madiwani na Wakuu wa Idara na Vitengo.

Uamuzi huo wa kununua vishikwambi ulifikiwa na baraza la madiwani ili kuendana na kukua kwa sayansi na teknolojia na kuondokana na matumizi makubwa ya karatasi yasiyokuwa na sababu hivyo halmashauri ikaamua kuepuka gharama hizo kwa kununua vishikwambi.

Hafla ya kukabidhiwa vishikwambi hivyo katika ukumbi wa halmashauri wa Jakaya Kikwete imeambatana mafunzo kwa madiwani na wataalam wa halmashauri namna ya kuvitumia vishikwambi hivyo katika utumaji wa taarifa mbalimbali za vikao na makabrasha ya vikao vya halmashauri kwa waheshimiwa madiwani.

Akikabidhi vishikwambi hivyo kwa wataalam wa halmashauri,Mwenyekiti wa halmashauri ,Hassani Mwinyikondo aliipongeza menejimenti ya halmashauri kwa kutekeleza maazimio ya baraza la madiwani kwa vitendo na kuwataka kuendelea kutekeleza maazimio mbalimbali kama ununuzi wa gari la takataka,ununuzi wa gari la kukusanyia mapato na ujenzi wa kituo cha kuegesha malori ambacho kitakuwa ni chanzo cha mapato cha halmashauri.

Naye Mkurugenzi wa halmashauri ya Chalinze, Bwana Ramadhani Possi aliwakabidhi vishikwambi waheshimiwa Madiwani na kuwataka wavitunze kwani ni vitendea kazi muhimu katika kazi zao na vitatumika kupokelea taarifa mbalimbali za halmashauri kwa kamati zote za kudumu na mkutano wa baraza la madiwani.

Kwa upande wake Mheshimiwa Nassa Karama diwani wa kata ya Bwilingu kwa niaba ya madiwani aliwashukuru watendaji wa halmashauri kwa kuwa wasikivu katika kutekeleza maamuzi ya baraza la madiwani kwa wakati na kusisitiza maazimio yote yaliyoamuliwa na baraza la madiwani yaendelee kutekelezwa kwa wakati.