Wakuu wa Idara na Vitengo wapata mafunzo Chalinze

Imewekwa: April 24th, 2025

Menejimenti ya Halmashauri ya Wilaya ya Chalinze imepatiwa mafunzo maalum ya namna ya kutumia mfumo mpya wa kushughulikia hoja za ukaguzi katika taasisi za serikali. Mafunzo haya muhimu yamefanyika leo katika Ukumbi Masafa wa Halmashauri, yakilenga kuwajengea uwezo Wakuu wa Idara na Vitengo katika kutekeleza majukumu yao kwa ufanisi zaidi kwa mujibu wa taratibu za ukaguzi.

Mafunzo haya yametolewa na Bwana Michael Maganga, ambaye ni Mkaguzi wa Ndani wa Halmashauri hiyo. Katika mafunzo hayo, Bwana Maganga ameielekeza menejimenti kwa kina namna ya kutumia mfumo huo hatua kwa hatua. Aliwaonesha namna ya kuzisoma hoja za ukaguzi zilizowasilishwa na wakaguzi, jinsi ya kuzijibu hoja hizo ipasavyo, pamoja na namna ya kuziwasilisha kwa mamlaka zinazohusika kupitia mfumo huo wa kisasa.

Kupitia mafunzo hayo, wajumbe wamepata uelewa wa kutosha kuhusu umuhimu wa mfumo huo na namna unavyorahisisha kazi ya kushughulikia hoja za ukaguzi kwa uwazi na uwajibikaji. Aidha, mfumo huo unatarajiwa kuongeza ufanisi wa utendaji kazi na kusaidia kuhakikisha kuwa hoja zote za ukaguzi zinashughulikiwa kwa wakati na kwa viwango vinavyotakiwa.

Wakuu wa Idara na Vitengo waliopatiwa mafunzo wamepongeza jitihada hizo na kuahidi kutumia maarifa waliyopata kikamilifu. Wameeleza kuwa mfumo huo utaongeza uwazi, uwajibikaji na kurahisisha mawasiliano kati ya Halmashauri na mamlaka za ukaguzi, hivyo kusaidia katika kuboresha utawala bora ndani ya Halmashauri ya Wilaya ya Chalinze.