Wakuu wa wilaya za Mafia na Kibiti Waapishwa Rasmi

Imewekwa: January 30th, 2023

Wakuu wa wilaya za Mafia na Kibiti leo wameapishwa rasmi na Mkuu wa Mkoa wa Pwani Mheshimiwa Abubakari Kunenge. Hafla fupi ya uapisho imefanyika katika Ukumbi wa Ofisi ya Mkuu wa Mkoa wa Pwani wakuu wa wilaya waliokula kiapo ni Kanali Samwel Kolombo, ambaye ameapishwa kuwa Mkuu wa wilaya ya Kibiti na Ndugu Zephania Stephen Sumaye ambaye ameapishwa kuwa Mkuu wa wilaya ya Mafia.Hafla hiyo ya uapisho imeshuhudiwa na viongozi,ndugu,jamaa na marafiki.

Baada ya zoezi la kiapo wakuu wa wilaya hao walikula kiapo cha uadilifu kwa viongozi wa umma,kiapo hicho waliongozwa na Kaimu Kamishina wa maadili mkoa wa Pwani kinachowataka kutunza maadili kama viongozi wa umma kwa mujibu wa sheria.

Kwa Upande wake Katibu Tawala wa Mkoa wa Pwani Bi Zuwena Omary alitoa nasaha zake kwa wakuu wa wilaya waliokula kiapo na wakuu wa wilaya waliohamia katika mkoa wa Pwani na kuwatakia utumishi uliotukuka na kuwataka kusimamia ukusanyaji mapato katika halmashauri na kuwataka kuongoza kwa misingi utawala wa sheria na kuahidi kuwapa ushirikiano wa hali ya juu katika kazi.

Naye Mwenyekiti wa CCM mkoa wa Pwani Msheshiwa Mwinshehe Mlao aliwakaribisha wakuu wa wilaya waliohamia na walioteuliwa na kuwataka wakatekeleze Ilani ya Uchaguzi ya Chama cha Mapinduzi kwa vitendo na kuwatakia utendaji mwema ndani ya mkoa wa Pwani.

Mkuu wa Mkoa wa Pwani Mheshimiwa  Abubakar Kunenge katika hotuba yake baada ya kuwaapisha wakuu wa wilaya aliwakabidhi vitendea kazi kama wakuu wa wilaya na kuwataka wakawe watumishi waendako katika maeneo yao ya kazi,akawataka wakasimamie utekelezaji wa Ilani ya Chama cha Mapinduzi, kusimamia vipaumbele vya Mheshimiwa Rais wa Jamhuri ya Muungano wa Tanzania, Dkt Samia Suluhu Hassan na kuwataka kuzingatia utawala wa sheria (Rule of Law) katika kutekeleza majukumu ya serikali.

Mheshimiwa Kunenge amewataka wakuu wa wilaya mkoani Pwani kuyajua maeneo yao ya utawala sanjari na kujua mahitaji ya wananchi hususan Elimu,Afya na maji ili kuweza kuyasemea kwa mamlaka za juu kwa hatua zaidi.

Mkuu wa Mkoa alimalizia kwa kuwapongeza viongozi wa wilaya zote na halmashauri kwa kazi nzuri wanazozifanya za ukusanyaji wa mapato na kuwataka viongozi walioapishwa na waliohamia kuendeleza mazuri waliyoyakuta ili mkoa wa Pwani uendelee kusonga mbele.