Walimu wapewa maelekezo ya kazi Chalinze

Imewekwa: July 10th, 2025

Na John Mlyambate, Chalinze

Tume ya Utumishi wa Walimu katika Wilaya ya Bagamoyo imetoa mafunzo maalum kwa walimu wapya walioajiriwa hivi karibuni katika Halmashauri ya Wilaya ya Chalinze. Mafunzo hayo yamelenga kuwajengea uwezo waajiriwa hao kuhusu taratibu za kiutumishi pamoja na maadili yanayopaswa kuzingatiwa katika taaluma ya ualimu.

Mafunzo hayo yamefanyika katika ukumbi wa mikutano wa Jakaya Kikwete, yakihusisha wadau mbalimbali wakiwemo maafisa kutoka Ofisi ya Utumishi ya Halmashauri ya Wilaya ya Chalinze na viongozi wa Chama cha Walimu Tanzania (CWT). Walimu waliopatiwa mafunzo wanatoka katika shule za msingi na sekondari ndani ya halmashauri hiyo.

Akizungumza katika mafunzo hayo, Kaimu Mkurugenzi wa Halmashauri ya Wilaya ya Chalinze, Bwana Archanus Kilaja, aliwataka walimu hao wapya kuwa na nidhamu ya kazi, kufanya kazi kwa weledi na kuzingatia sheria, kanuni na taratibu zinazosimamia utumishi wa umma.

Bwana Kilaja alisisitiza kuwa ualimu ni wito unaohitaji moyo wa kujitolea na uwajibikaji wa hali ya juu. Alisema walimu wana nafasi muhimu katika kuandaa kizazi cha baadaye cha taifa, hivyo wanapaswa kufahamu kuwa wao ni kioo cha jamii na wanapaswa kuwa mfano bora kwa wanafunzi wao.

Aidha, aliwataka walimu hao kufuata mipango kazi ya shule na kushirikiana na walimu wakuu pamoja na viongozi wa elimu katika maeneo yao ya kazi. Alisema ushirikiano ni msingi wa mafanikio ya kitaaluma kwa walimu na ufaulu wa wanafunzi mashuleni.

Wawakilishi wa Ofisi ya Utumishi na CWT walisisitiza umuhimu wa walimu kufahamu haki na wajibu wao kazini. Pia walieleza kuwa serikali ipo tayari kuwasaidia walimu wanaotekeleza wajibu wao kwa bidii na uadilifu, lakini haitavumilia walimu watakaokiuka maadili ya kazi.

Mafunzo hayo yametoa fursa kwa walimu kujifunza kuhusu matumizi ya miongozo ya utumishi wa umma, namna ya kuandaa na kutekeleza mipango kazi ya kila siku, pamoja na kujenga mahusiano mazuri na wanafunzi, wazazi na jamii kwa ujumla.

Walimu wapya waliopatiwa mafunzo wametoa shukrani kwa tume na halmashauri kwa kuwaandalia mafunzo hayo, wakisema kuwa yamewaandaa vyema kwa safari ya kazi waliyoianza rasmi. Waliahidi kuwa watatumia mafunzo hayo kama mwongozo wa utendaji kazi wao wa kila siku.