Wananchi wa Chalinze watakiwa kuchangamkia fursa ya urasimishaji makazi

Imewekwa: August 22nd, 2023

Wananchi wa kitongoji cha Pera ,kata ya Pera katika Mamlaka ya Mji Mdogo wa Chalinze wametakiwa kuchangamkia fursa ya urasimishaji wa makazi kupitia Mradi wa Urasimishaji unaotekelezwa na serikali ya Tanzania kupitia Benki kuu ya Dunia . Kauli hiyo imetolewa leo katika Mkutano wa Uhakiki wa Milki za Ardhi(Public Display) uliofanyika leo katika Ofisi ya Mtendaji wa Kata ya Pera.

Akizungumza katika Mkutano wa uzinduzi wa zoezi la uhakiki wa milki za Ardhi, Meneja wa Urasimishaji Mijini wa Mradi kutoka Wizara ya Ardhi, Bwana Leons Peter Mwenda ametoa Elimu kwa umma juu ya faida za urasimishaji na umilki wa ardhi kwa wananchi wa Pera,amewataka wananchi kuwa makini katika zoezi hili la uhakiki milki za ardhi kabla ya kuanza kupandwa mawe katika viwanja vyao kwa kujiridhisha kuhusu taarifa zao walizojisajili kama ziko sahihi.

Mwenda katika Mkutano huo alieleza vitu vya msingi katika uhakiki wa milki za ardhi,ikiwa ni pamoja na usahihi wa majina ya mmilki yanayofanana na majina yaliyo katika vitambulisho vya utaifa,usahihi wa namba ya NIDA,namba ya simu iwe sahihi kwani ndiyo itakayotumika katika mawasiliano yote katika mchakato wa urasimishaji makazi,hivyo namba ya simu inatakiwa iendane na majina yaliyo kwenye kitambulisho cha NIDA.

Aidha Mwenda aliweza kufafanua aina mbalimbali za umilki kwa mujibu wa sheria ambazo wananchi wanaweza wakaamua kumilki kutokana na utashi wao. Umilki huo ni pamoja na Umilki wa pekee ni umilki ambao mtu anamilki pekee, Umilki wa pamoja usiogawanyika wa mke na mme,umilki huu ni maalum kwa mke na mme walioowana na mmoja wapo akifariki anayebaki anaendelea kuwa mmilki halali pasipo mchakato wowote wa mirathi.

Umilki mwingine aliotolewa ufafanuzi katika mkutano huo ni umilki chini ya msimamizi mlezi,umilki huu unafanywa na mzazi kama msimamizi wa mtoto ambaye hajafikisha miaka 18,hivyo kwa kuwa sheria za Tanzania haziruhusu umilki wa mali kwa mtu aliye na umri chini ya miaka 18 mzazi sharti awe mdhamini. Umilki mwingine ni umilki wa usimamizi wa mirathi na umilki wa ardhi kwa hisa.

Mgeni Rasmi katika uzinduzi wa zoezi la uhakiki wa Milki za ardhi, Mheshimiwa Mussa Gama,Mwenyekiti wa kamati ya Uchumi ,Ujenzi na Mazingira na Diwani wa kata ya Vigwaza aliishukuru serikali kwa mradi wa urasimishaji ardhi kwani ni suluhisho la migogoro katika halmashauri yetu ya Chalinze na kuwataka wananchi kushiriki kikamilifu katika zoezi hili muhimu la uhakiki wa milki za ardhi kwa faida yao.