Wananchi wa Chalinze watakiwa kufuata Sheria na taratibu zilizowekwa ili kupata umiliki wa ardhi usioleta migogoro

Imewekwa: January 23rd, 2026

Na Mkombozi Zumba

Halmashauri ya Chalinze imeendelea kushughulikia kero za wananchi wake kwa kusikiliza na kutatua migogoro mbalimbali ya ardhi, ambapo jana, Januari 22, 2026, ilipokea na kusikiliza malalamiko ya wananchi wa Kijiji cha Kibindu kuhusu mgogoro wa ardhi kati yao na mwekezaji, pamoja na mgogoro mwingine wa ardhi uliotokea Kata ya Vigwaza.

Kikao hicho kilifanyika kwa lengo la kusikiliza pande zote zinazohusika ili kupata ufumbuzi wa kudumu wa migogoro hiyo, huku viongozi wa serikali wakisisitiza umuhimu wa kufuata sheria, kanuni na taratibu za umiliki wa ardhi kama zilivyoainishwa kisheria.

Akizungumza katika kikao hicho, Katibu Tawala wa wilaya ya Bagamoyo, Bi. Stella Msofe, alisema ofisi yake imepokea mashauri hayo kwa uzito unaostahili na kuwataka wananchi kuwa wavumilivu wakati serikali ikiendelea kuyafanyia kazi kwa kuzingatia misingi ya haki na sheria za nchi.

Aidha, Bi. Stella alitoa rai kwa Wananchi akiusoma waraka uliotolewa na Mkuu wa Wilaya ya Bagamoyo unaohusu umiliki wa ardhi,waraka namba 1 wa 2025 ambapo Vitongoji, Vijiji na Kata vinatakiwa kuacha uuzaji/usimamizi wa maeneo bila kibali cha wahusika ,bila kumuona Mkurugenzi mtendaji wa Halmashauri hiyo ili kuepuka dhuluma na maumivu kwa wengine akisema kuwa waraka huo unaeleza kwa kina haki, wajibu na taratibu za kisheria za kumiliki ardhi, jambo litakalosaidia kupunguza migogoro ya aina hiyo katika jamii.