Wanawake waaswa Kuwa Mabalozi wa Nishati Safi katika Jamii

Imewekwa: October 19th, 2024

Katika juhudi za kuhamasisha matumizi ya nishati safi ya kupikia, Mratibu wa Nishati Safi ya Kupikia wa Halmashauri ya Wilaya ya Chalinze, Mohammed Abas Dengwa, amewataka wanawake kuwa mabalozi wazuri katika jamii zao. Hayo yalisemwa katika hafla ya kutoa elimu kwa wanawake wajane na wale wenye watoto wasio na wenza kutoka kata kumi na tano za Halmashauri ya Chalinze.

Dengwa alifafanua kuwa lengo la kikao hicho ni kukuza uelewa kuhusu matumizi ya nishati safi, na kuongeza kuwa wanawake watapatiwa mitungi ya gesi ili kusaidia kutokomeza matumizi ya nishati chafu kama mkaa na kuni, hivyo kulinda mazingira. Hafla hiyo ilifanyika katika ukumbi wa Mikutano wa Jakaya Kikwete, Chalinze.

Mkuu wa Jeshi la Zima Moto na Uokoaji Chalinze, Inspekta Elnino Shang’a, pia alihudhuria na kutoa elimu juu ya kujikinga na madhara ya moto yanayotokana na matumizi ya gesi. Aliwasisitizia washiriki umuhimu wa kuwa na vifaa maalumu kama blangeti za kuzima moto ili kukabiliana na hatari zinazoweza kutokea.

Mharakishi wa hafla hiyo alisisitiza kuwa jitihada hizi zinaunga mkono ajenda ya Rais Dkt. Samia Suluhu Hassan, ambaye ana lengo la kuhakikisha ifikapo mwaka 2030, watu milioni 300 Afrika wanatumia nishati safi ya kupikia, hivyo kuimarisha mazingira salama kiafya na kimazingira.