Wanawake wajawazito waaswa kufika vituo vya afya pindi wanapohisi maumivu na uchungu

Imewekwa: July 9th, 2024

Wanawake wajawazito  wameaswa kuwahi kufika kwenye vituo vya Afya na Hospitali pindi wanapoanza kuhisi maumivu na uchungu ili waweze kufanyiwa vipimo kabla ya kujifungua kwa lengo la kuokoa maisha ya mama na Mtoto.

Hayo yamesemwa na Mganga mfawidhi wa kituo cha Afya  cha Chalinze Dkt Isdori Mfugale  leo Julai 8,2024 alipokuwa akifanya mahojiano na  kituo cha Chalinze fm kwenye kipindi cha Gumzo leo kinachoruka kila jumatatu hadi ijumaa kuanzia saa 04:00 hadi saa 07:00 mchana.

Pia Dkt Mfugale amesema mfumo huo unao muwezesha  mama kujifungua akiwa kwenye  beseni maalumu (Jacuzzi/water birth) lenye maji ya uvugu uvugu ni teknolojia  inayomwezesha  mama  mjamzito kujifungua mtoto wake akiwa ndani ya beseni hilo kwa kumpunguzia  maumivu chini ya  usimamizi na uangalizi maalumu kutoka kwa  wataalamu wa teknolojia hiyo na huduma  hiyo  imeanza kutolewa katika Hospitali ya Taifa Muhimbili .

Akizitaja faida atakazo zipata mama mjamzito anapojifungulia kwenye beseni hilo amesema itamsaidia mama huyo kupunguza maumivu ,kupunguza uwezekano wa kuchanika wakati wa kujifungua, inamsaidia  kumuandaa kisaikolojia akiwa katika hali ya uchungu na kutumia muda mfupi  wakati wa kujifungua .Pia amesema  ni njia isiyo zuia maendeleo ya uchungu kwa mama mjamzito.

Aidha Dr Mfugale amesema  huduma hiyo ni salama kwa mama na mtoto kama itafanywa na wataalamu wanaotoa huduma hiyo.Pia ni huduma inayohitaji maandalizi mbalimbali ikiwemo na upimaji wa afya kwa kumfanyia mama huyo vipimo ili afahamu kama ana vigezo vinavyo ruhusu kujifungua katika beseni hilo maalumu.

Sanjari na hayo ametaja sababu zinazosababisha mama kutoweza kujifungua katika beseni hilo maalumu ni pamoja kuwa na maambukizi ya UKIMWI,homa ya ini,asiwe na changamoto kwenye via vya uzazi pia  awe na uwezo wa kujifungua pasipo kufanyiwa upasuaji.Kadhalika kwa upande wa mtoto anapaswa awe katika mlalo ulio sahihi pindi anapokuwa tumboni.

Vile vile Mganga mfawidhi wa kituo cha Afya cha Chalinze ametoa wito kwa watoa huduma kuwa na lugha rafiki wakati wa kuwahudumia kina mama hao wanapo jifungua  ili kuwasaidia kuwaandaa kisaikolojia itakayo pelekea mama huyo kujifungua salama.