Watendaji simamieni majukumu yenu na kufanya maamuzi kwa mujibu wa kanuni, sheria na taratibu

Imewekwa: March 16th, 2021

Hayo yamesemwa leo na  Mwenyekiti wa Halmashauri Mh. Geofrey Kamugisha alipofanya kikao chake cha kwanza na watendaji wote wa Vijiji na Kata katika ukumbi wa Halmashauri ya Wilaya ya Chalinze.

Mwenyekiti wa Halmashauri Mh. Geofrey Kamugisha amefanya kikao cha pomoja na watendaji wa Kata na Vijiji wote ili kuwasikiliza changamoto zao na kuona namna ambavyo anaweza kuzitatua ili kuwawekea mazingira mazuri ya ufanyajikazi kwa ajili ya ustawi wa Chalinze.

Awali akizungumza kabla ya kuruhusu kupokea changamoto kwa watendaji  Mh. Kamugisha aliwaambia watendaji hao madhumuni ya kuwa na kikao cha pamoja ni kusikiliza changamoto zinazowakabiri katika maeneo yao ya kazi. Aidha Aliwataka watendaji kusimamia kwa weredi ukusanyaji wa mapato katika maeneo yao ili kuiwezesha Chalinze kupata fedha za kutosha zitakazosaidia katika utekelezaji wa mambo mbalimbali ya maendeleo katika maeneo yao.

Akitoa dira ya Halmashauri, aliwaambia Halmashauri ya Chalinze imepanga kufanya mambo mengi na kutekeleza miradi mkakati ili kuongeza vyanzo vya mapato. Miongoni mwa miradi hiyo ni pamoja na ujenzi wa stendi ya mabasi Chalinze, Maegesho ya Magari makubwa, Soko, ununuzi greda, ununuzi Matrekta angalau moja kwa kila kata na upimaji wa ardhi ili miradi hii yote iweze kusaidia kuongeza mapato katika Halmashauri.

hivyo Watendaji wakiwa kama wasimamizi wanahitaji kusimamia upatikanaji wa mapato kwa kuziba mianya yote ambayo inaweza pelekea upotevu wa mapato.

“Lengo la kila Halmashauri katika nchi yetu ni kuona inatekeleza mambo yake iliyo jiwekea  katika bajeti  kwa asilimia (100%) ili kuleta ustawi wa wananchi wakazi na wapitao katika maeneo yao. kufikia adhima hiyo, niwajibu wa kila mtu ikiwa ni pamoja na watendaji na  wanasiasa kuhakikisha wanasimamia upatikanaji wa fedha (mapato) katika maeneo yao, hili linaenda sambamba na uibuaji wavyanzo vipya ili Halmashauri isitegemee chanzo kimoja tu kikuu yaani machimbo ya kokoto”. Alisema  Mh. Kamugisha

Aidha Mh. Kamugisha aliongezea kusema, “Nimekuwa nikikutana na changamoto mbalimbali niwapo katika ziara zangu vijijini na changamoto nyingi husababishwa na watendaji kushindwa kufanya maamuzi kwa wakati, hivyo nawaagiza leo watendaji wote kufanya kazi zenu pasipo kuyumbishwa wala kuogopa chochote lakini zingatieni sheria , kanuni, taratibu na miongozo iliyowekwa.”

Akihitimisha, Mh. Kamugisha alisema, “Zipo changamoto nyingi ambazo kama Watendaji mmezizungumza ikiwemo ugumu wa uendeshaji wa ofisi kwa kutokuwapo na fungu la kutosha, kama kiongozi napenda kuwaahidi kuwa nimezichukua changamoto zenu na ninakwenda kuzifanyia kazi moja baada ya nyingine. Yapo mambo ambayo mmeyasema na tayari yapo kwenye mpango wa bajeti wa mwaka wa fedha ujao na mengine yapo kwenye utekelezaji wa bajeti ya mwaka wa fedha unaoendelea hivyo tuendelee kuwasiliana pale ambapo mtaona mambo hayaendi sawa”.

Aidha Mh. Kamugisha aliwakumbusha watendaji wa vijiji pamoja na kata kuwa mpaka sasa Serikali imefanikiwa kununua pikipiki kwa maafisa Ugani na Mifugo wa Kata, Waratibu wa Elimu kata wote na watendaji wa kata wote ni adhima ya serikali kununua pikipiki kwa watendaji wa vijiji wote. Pia aliwasihi, kwa kuwa vijiji ni vingi, hutekelezaji huo utafanyika kwa awamu kwa kuzingatia vijiji vyenye changamoto zaidi ndivyo vitakavyopewa kipaombele.

Aliwataka watendaji kutokua chanzo cha migogoro na kuhakikisha wanasimamia matumizi bora ya ardhi kwa kuwaongoza wafugaji na wakulima katika maeneo yao na kusimamia namna bora ya uendeshaji wa shughuli za kiuchumi ili pasiwepo migongano ya aina yoyote ambayo inaweza sababisha kutokea kwa uvunjifu wa amani.