Watendaji wa Kata na Vijiji Waomba kupatiwa sitahiki zao kwa wakati

Imewekwa: June 23rd, 2023

                                        Na John Mlyambate

Watendaji wa Kata na Vijiji katika Halmashauri ya Chalinze wameomba kupatiwa sitahiki zao kwa mujibu wa sheria ziwe zinatolewa kwa wakati pasipo kuchelewa,maombi hayo wameyatoa leo katika kikao kazi kilichofanyika katika ukumbi wa Mikutano wa Jakaya Kikwete.

Sitahiki walizoomba ziwe zinatolewa kwa wakati ni malipo kwa ajili ya likizo na posho mbalimbali wanazositahili kulipwa sanjari na kuhudumiwa kwa wakati wanapokuwa wamekuja makao makuu ya halmashauri kwa shida mbalimbali za kiofisi na binafsi.

Kikao hicho kilifanyika chini ya uenyekitj wa Mkurugenzi Mtendaji wa Halmashauri ya wilaya ya Chalinze,Bwana Ramadhani Possi na viongozi mbalimbali katika halmashauri kwa maana ya wakuu wa Idara na vitengo.

Akiongoza kikao hicho Mkurugenzi wa Halmashauri aliwataka watendaji kuwa huru katika kuzibainisha Changamoto mbalimbali zinazowafanya washindwe kutekeleza majukumu yao ya kila siku.

Kwa Upande wake Mkuu wa Divisheni ya Utumishi na Utawala ,Bwana Archanus Kilaja aliahidi kuzishughulikia Changamoto zinazowakabili watendaji wa kata na vijiji kwa misingi ya kuboresha utawala bora katika halmashauri ya Chalinze.