Watendaji wa Kata na Vijiji wapewa Mafunzo ya namna ya kukusanya Kodi ya Majengo Chalinze

Imewekwa: May 7th, 2025

Na John Mlyambate

Watendaji wa Kata na Vijiji katika Halmashauri ya Wilaya ya Chalinze wamepatiwa mafunzo maalum kuhusu ukusanyaji wa kodi ya majengo (Property Tax) ili kuongeza ufanisi wa ukusanyaji wa mapato katika maeneo yao ya utawala. Mafunzo hayo ni sehemu ya jitihada za serikali katika kuhakikisha kuwa kila mwananchi anayemiliki jengo analipa kodi stahiki kwa maendeleo ya taifa.

Mafunzo hayo yametolewa na wataalam kutoka Sekretarieti ya Mkoa wa Pwani kwa kushirikiana na wataalam wa Halmashauri ya Wilaya ya Chalinze. Watendaji kutoka kata zote 15 pamoja na vijiji 74 vya halmashauri hiyo walishiriki katika mafunzo hayo ambayo yalilenga kuwawezesha kiufundi na kisheria juu ya zoezi hilo muhimu la ukusanyaji wa mapato.

Katika mafunzo hayo, washiriki walipewa elimu juu ya njia mbalimbali za ukusanyaji wa kodi ya majengo, matumizi ya mifumo ya kielektroniki katika ukusanyaji huo, pamoja na viwango vya tozo vinavyopaswa kutozwa kwa mujibu wa sheria. Pia walielezwa taratibu sahihi za kukusanya kodi hiyo, uthamini wa majengo, na wigo mpana wa ukusanyaji kodi katika maeneo yao.

Mafunzo hayo yalilenga kuhakikisha kuwa watendaji wanakuwa na uelewa wa pamoja kuhusu mchakato mzima wa ukusanyaji wa kodi ya majengo, kuondoa mkanganyiko uliokuwepo awali, na kuhakikisha kuwa hakuna mapato yanayopotea kutokana na kutokuwepo kwa taarifa sahihi au ufuatiliaji hafifu.

Aidha, watendaji wa kata na vijiji walipewa majukumu mahsusi ya kufanikisha ukusanyaji wa kodi katika maeneo yao. Walielekezwa kuhakikisha wanatambua majengo yote, wanashirikiana kwa karibu na wananchi, na wanatumia vizuri mifumo ya kielektroniki iliyowekwa kwa ajili ya ukusanyaji wa kodi hiyo.

Serikali ya Wilaya ya Chalinze inaamini kuwa kupitia mafunzo hayo, ukusanyaji wa kodi ya majengo utaongezeka kwa kiasi kikubwa, hali itakayoiwezesha halmashauri kutoa huduma bora zaidi kwa wananchi kupitia mapato ya ndani yatakayopatikana.