Waziri Bashungwa awataka watumishi wa umma kuwa wazalendo katika kuwatumikia wananchi

Imewekwa: October 10th, 2024

Waziri wa Ujenzi Innocent Bashungwa amewataka watumishi kuweka uzalendo mbele kwa kuwatumikia wananchi kwa weledi wanapofika kwenye maeneo yao kupata huduma.

Bashungwa alitoa Rai hiyo jana alipokuwa akiweka jiwe la Msingi katka ujenzi wa nyumba za wakuu wa idara wa Halmashauri ya Chalinze ambapo alisema uwepo wa makazi hayo itumike kama motisha katika utendaji wao.

Alisema nyumba hizo zinatakiwa kuwa motisha kwao katika utendaji kazi kwa kujituma kwenye kutoa huduma kwa wananchi na kuepuka kuwa sababu ya kuchelewesha maendeleo kwenye maeneo yao.

Bashungwa aliipongeza Halmashauri ya Chalinze kwa kuwa na miradi ya kimkakati ukiwemo wa ujenzi wa nyumba za wakuu wa idara ambazo zinakwenda kuwa muarobaini wa kuwahi kazini na kufanya kazi kwa bidii.

Wakati huo huo alitoa maelekezo kwa Naibu Katibu Mkuu Wizara ya Ujenzi  Dk.Charles Msonde kufika katika Halmashauri hiyo akiwa na Wakala wa Majengo nchini (TBA) kuangalia muundo wa nyumba hizo na ubora wake.

Bashungwa alisema kupitia muundo huo TBA wanatakiwa kuangalia namna watakavyojipanga na Halmashauri na kujenga nyumba za watumishi kwa gharama nafuu ikiwezekana kuanzia katika Halmashauri ya Chalinze Ili uendelee kuwa ndani 

Mkuu  wa Divisheni ya miundombinu Halmashauri ya Chalinze Olais Sikoi alisema ujenzi wa nyumba sita ulianza Oktoba 2022 baada ya kutengewa sh. Milion 800 kutoka Serikali kuu katika mwaka wa fedha 2022/2023.

Sikoi alibainisha kwamba katika mwaka wa fedha 2023/2024 Halmashauri hiyo kwa mara nyingine ilipokea sh. Milioni 320 kwa ajili ya ujenzi wa nyumba mbili za wakuu wa idara mradi ambao ulianza mwezi Machi mwaka huu na ulitarajiwa kukamilika mwezi Septemba.

Katika ziara yake kwenye Halmashauri hiyo Bashungwa mbali ya kuweka jiwe la Msingi kwenye ujenzi wa nyumba za wakuu wa idara pia qmezindua soko la Bwilingu lililogharimu sh. Bilioni 1.7 na kuweka jiwe la Msingi katika shule ya Sekondari Jakaya Kikwete