Waziri Jafo aelekeza maonyesho ya Biashara na Uwekezaji kufanyika Kitaifa Mkoani Pwani kila mwaka

Imewekwa: December 17th, 2024

WAZIRI wa Viwanda na Biashara Dk Selemani Jafo amemuagiza  Katibu Mkuu wa Wizara hiyo Dk. Hashil Abdallah kuhakikisha  maonyesho ya biashara na uwekezaji yanafanyika kitaifa  kila mwaka katika Mkoa wa Pwani.

Dk. Jafo ametoa agizo hilo leo alipokuwa akizindua maonyesho hayo ambayo yanafanyika kwa awamu ya nne katika Mkoa huo yakiwashirikisha wawekezaji mbalimbali wa Mkoa huo pamoja na wajasiriamali wadogo.

Waziri huyo alisema Mkoa wa Pwani umekuwa ukiandaa maonyesho ya biashara ya kiwango cha kitaifa ambayo yanawakutanisha wawekezaji wengi hivyo ni vema kuanzia 2025 maonyesho hayo yakafanyika kwa ngazi ya kitaifa kama yalivyo mengine ya biashara .

" Maonyesho haya kuanzia mwaka ujao yawe ya kitaifa na yasimamiwe na Wizara ya Viwanda na Biashara kama yalivyo mengine hili ni agizo kwa Katibu Mkuu wa Wizara," alisema.

Dkt.Jafo pia aliziagiza Taasisi wezeshi kutokuwa wakwamishaji kwa wawekezaji wanaotaka kuwekeza hapa nchini kwani wakizingatia utoaji huduma unaotakiwa watachangia kuvutia wawekezaji wengi.

Alisema Serikali inaendelea kutengeneza mazingira wezeshi kwa ajili ya kuvutia wawekezaji hivyo hategemei kuwe na vikwazo katika eneo hilo.

Waziri Dkt.Jafo pia aliwataka wazalishaji wa bidhaa kuzingatia ubora wa bidhaa ambazo zitakidhi kushindanishwa katika masoko ya ndani na nje ya nchi.

Mkuu wa Mkoa wa Pwani Abubakar Kunenge aliomba Shirika la Maendeleo ya Petrol Tanzania kuwajengea Bomba la gesi Ili kuwarahisishia wawekezaji wanaotaka kutumia gesi.

Kunenga alisema pamoja na kuwepo kwa maboresho katika sekta ya nishati ya umeme kwa kuongeza megawati lakini pia wapo wawekezaji wanahitaji nishati ya gesi viwandani.

Mkuu huyo wa Mkoa alisema kutokana na ongezeko la megawati kwa asilimia 19 limesabanisha wawekezaji kufanya shughuli zao za uzalishaji muda wote ukilinganisha na awali ambapo walikuwa wakizaliisha kwa siku tatu hadi nne kwa wiki.

Mkoa wa Pwani kwa sasa una viwanda 1533 kati ya hivyo viwanda vikubwa vilivyolengwa katika awamu ya sita ni 78 na kwamba bado yapo maeneo makubwa yaliyotengwa kwa ajili ya uwekezaji yakiwa na miundombinu wezeshi inayotakiwa.