Waziri Kikwete atoa Tuzo kwa shule za Msingi zilizofaulu vizuri mitihani ya Kitaifa Chalinze

Imewekwa: March 1st, 2025

Waziri wa Nchi Ofisi ya Waziri Mkuu Kazi Vijana Ajira na wenye Ulemavu na Mbunge wa Chalinze Mhe Ridhiwani Kikwete jana Februari 28,2025 amegawa Tuzo kwa Shule za Msingi zilizofanya vizuri katika matokeo ya Darasa la nne na la saba.

Akizungumza na Maafisa Elimu msingi kata, Walimu Wakuu pamoja na Viongozi wa Siasa waliohudhuria hafla hiyo iliyo fanyika katika ukumbi wa shule ya Sekondari ya  Lugoba Mhe Ridhiwani ametoa wito kwa Wakuu wa Shule zote za Msingi zilizopo  Halmashauri ya Chalinze kuongeza jitihaada za kufundisha ili kuongeza ufaulu katika mitihani hasa ya Kitaifa ili kuwa katika nafasi nzuri kitaaluma.

Aidha Mhe kikwete amempongeza Mkurugenzi Mtendaji Halmashauri ya Chalinze Bwana Ramadhani Possi kwa kushirikiana na Madiwani katika utekelezaji wa miradi ya ujenzi wa Madarasa kwa kukamilisha na kukabidhi kwa wakati huku akitoa mfano wa shule shikizi ya Ridhiwani Jakaya Kikwete iliyopo Kata ya Bwilingu.

Akizitaja baadhi ya njia zilizo saidia kuongezeka kwa ufaulu Mkurugenzi Mtendaji Bwana Ramadhani Possi amesema ni pamoja na  juhudi za maafisa elimu na Walimu kuongeza mbinu za ufundishaji kwa vitendo hali inayo saidia  wanafunzi kufanya vizuri kwenye mitihani yao.

Kadhalika Afisa Elimu Awali na Msingi Bi Miriam Kihiyo pia ametoa pongezi za kuongezaka kwa  ufaulu .Sanjari na hayo amezitaja changamoto za baadhi ya wazazi wanao wasababishia watoto  wao utoro kwa kutowapa mahitaji muhimu kama kuwalipia chakula ili waweze kupata mlo wa mchana wakiwa Shuleni,mavazi pamoja na mahitaji mengine ya mwanafunzi.Pamoja na hayo  amesema kuwa  kuna baadhi ya wazazi  wanawashawishi watoto wao wasifanye vizuri kwenye mitihani mikubwa hasa ya Kitaifa.

Hafla hiyo imejumuisha ugawaji wa Tuzo pamoja na Fedha Taslimu kwa shule tatu bora za Serikali  Shule ya Msingi Kinzagu ilishika nafasi ya kwanza ikifuatiwa na shule ya msingi Pingo huku nafasi ya tatu ikishikwa na shule ya msingi Saleni.Vile vile kwa Shule za binafsi ambazo zilipata Tuzo hizo ni pamoja na shule ya msingi ya Mtakatifu Alphonsa, Shule ya Msingi Apostle na Shule ya Honest zinazopatikana Kata ya Bwilingu.