Wilaya ya Kipolisi ya Chalinze yapatiwa gari jipya na Serikali

Imewekwa: August 5th, 2023

                      Na John Mlyambate,Chalinze

Wilaya ya kipolisi ya Chalinze imepatiwa gari jipya kwa matumizi ya Ulinzi na doria mbalimbali,gari hilo limetolewa na serikali kwa misingi ya kuimarisha utendaji wa Jeshi la polisi wilayani humo. Hafla fupi ya mapokezi ya gari hilo imefanyika katika uwanja wa polisi na kuhudhuriwa na wananchi na viongozi wa dini.

Mgeni rasmi katika hafla ya uzinduzi wa matumizi ya gari hilo Mheshimiwa Ridhiwani Kikwete(MB) alimshukuru Rais wa Jamhuri ya Muungano wa Tanzania Dkt Samia Suluhu Hassan kwa kuwapatia gari Jeshi la polisi katika wilaya ya kipolisi iliyopo katika Jimbo la Chalinze ili kuimarisha ulinzi na usalama kwa wananchi wa Chalinze.

“Namshukuru sana Rais wa Jamhuri ya Muungano wa Tanzania,Dkt Samia Suluhu Hassan kwa upendo na huruma kwa wananchi wa Chalinze kutupatia gari hili ikiwa nia ishara ya kutuimarishia usalama katika eneo hili,pia nimshukuru Inspekta Mkuu wa Polisi(IGP) kwa kuwajali wanachalinze na watanzania kwa ujumla.” Ridhiwani alisema.

Mheshimiwa Ridhiwani Kikwete aliongeza kwa kuwataka Jeshi la polisi kulitunza gari hilo ili liweze kudumu na kutumika muda mrefu kwa kuliendesha kwa uangalifu sanjari na kuwahi kufika eneo la tukio kwa wakati ili kuimarisha ulinzi na usalama wa wananchi.

Aidha Naibu Waziri,Mheshimiwa Ridhiwani Kikwete alitoa maelekezo kwa Mkurugenzi Mtendaji wa Halmashauri ya Chalinze kuhakikisha gari hilo limefungwa mataili mapya na king’ora kipya ili lifanye kazi pasipo shaka katika kuimarisha ulinzi na usalama na baada ya hapo mheshimiwa Ridhiwani Kikwete alikata utepe kuashiria kuanza kutumika rasmi kwa gari hilo.