Ziara ya Msemaji Mkuu wa Serikali Dk.Hassan Abbas.

Imewekwa: September 20th, 2019

Mkurugenzi wa idara ya Habari na Msemaji Mkuu wa Serikali Mhe.Dkt. Hassan Abbasi, ameipongeza Halmashauri ya Wilaya ya Chalinze kwa kuweka mipango ya kuanzisha kituo cha radio ya Halmashauri ili kuweza kuelimisha jamii na kutoa habari zote za maendeleo ndani na nje ya Halmashauri ili ziweze kuwafikia wananchi kikamilifu na kwa muda sahihi.

‘’Naipongeza sana Halmashauri ya Wilaya ya Chalinze  kupitia Mkurugenzi Mtendaji Bi.Amina Kiwanuka na Afisa Habari, Uhusiano na Mawasiliano wa Halmashauri Ndugu.John Mlyambate kwa kujitahidi kutoa taarifa kwa wananchi na pia pongezi kwenu kwa kuliona suala la kuanzisha kituo cha redio ndani ya Halmashauri.’’Alisema Dkt Hassan Abbasi.  

Vilevile Dkt Abbasi amewaomba na kuwaagiza wakuu wa vitengo mbalimbali katika Halmashauri yaWilaya ya Chalinze kushirikiana vyema na Afisa Habari, Uhusiano na Mawasilianowa Halmashauri kwa kumpatia taarifa mbalimbali za maendeleo ili ziweze kuwafikia wananchi kwa usahihi na kwa wakati.  

Hata hivyo Dkt Abbasi hakuacha kuhimiza maagizo na maelezo yote yaliyotolewa na Mhe. Kassim Majaliwa , Waziri Mkuu wa Tanzania katika Kikao cha Maafisa Habari, Uhusiano na Mawasiliano serikalini, kilichofanyika Machi 18,2019 katika ukumbi wa Benki kuu jijini Mwanza kwa kusema..

‘’Nawakumbusha na nawahimiza viongozi na watendaji wote wa taasisi za umma mfuate maelekezo yote yaliyotolewa na Mh. Waziri Mkuu, malekezo hayo ni kama vile, Ushirikiano baina ya viongozi,watendaji wa Umma na maafisa Habari, Uzinduzi wa tovuti za Halmashauri  kwa lengo la kuiongezea serikali uwezo wa kuwapatia wananchi habari, Kubainisha vikwazo vya kimuundo, kisera au kisheria na kuziwasilisha serikalini kwa lengo la kuongeza ufanisi wa kada hii na pia kila Wizara, Mikoa,Halmashauri na Taasisi zote ziweke kipaumbele katika kuvinunulia vitengo vya Habari vifaa muhimu kwaajili ya habari kama vile Kamera, Kompyuta na Simu ili maafisa habari watekeleze wajibu wao ipasavyo.’’

Ameyasema hayo wakati alipokwenda kuitembelea Halmashauri ya Wilaya ya Chalinze hivi karibuni ikiwa ni kwa lengo la kujionea juhudi za maendeleo ya kitengo cha Habari, Uhusiano na Mawasiliano katika Halmashauri hiyo.

Ikumbukwe kuwa hata Katiba ya Jamhuri ya Muungano wa Tanzania inataka umma uhabarishwe kama ilivyo katika Ibara ya 18(d), kwa kufanya hivyo ni kutekeleza sheria iliyopitishwa tarehe 1 September 2016 ambayo ni sheria ya haki ya kupata taarifa (Access to Information Act of 2016).