ZIARA YA UKAGUZI ENEO LA MRADI WA VIWANJA MSOLWA

Imewekwa: February 11th, 2022

Mwenyekiti Kamati ya Fedha na timu ya wakuu wa idara Halmashauri ya Wilaya ya Chalinze wamefanya ziara ya ukaguzi kwenye eneo lililotengwa kwaajili ya mradi wa viwanja vitakavyopimwa kwaajili ya mipango miji ilillopo katika kijiji cha Msolwa.

Katika ziara hiyo Mwenyekiti wa Halmashauri ya Wilaya ya Chalinze Mhe. Hassan Rajab Mwinyikondo amezungumza na waandishi wa habari kuwa lengo la kufanya ziara iyo ni kukagua na kuhakiki mradi huo wa viwanja ili kuepuka matapeli.

“Kwanza nimshukuru Rais wetu Mhe. Samia Suluhu Hassan kwa kutupatia fedha hizi za mradi huu kwani ametujali na ametuthamini sana na hii leo tumekuja kuhakiki viwanja japokuwa wataalamu wetu wamefanya ila na sisi tunataka tujiridhishe ili kuhakikisha mradi huu hautokuwa na hujuma yeyote”. Amesema Mhe. Mwinyikondo.

Vilevile Mheshimiwwa Mwenyekiti ameongeza kwa kuwasihi wananchi pamoja na wataalamu kuepukana na udanganyifu pamoja na matapeli katika mradi huo

“Niwasihi wananchi kuepukana na vishoka na udanganyifu katika mali na haji zao na hivyohivyo kwa wataalamu kufuata sharia na taratibu katika kutwaa ardhi na kujiepusha na udanganyifu kwani itakaponainika kuna udanganyifu sheria itachukua mkondo wake”. Amesema Mhe Mwinyikondo

Aidha Kaimu Mkuu wa Idara ya Ardhi Halmashauri ya Wilaya ya Chalinze Ndg. Mussa Kichumu ameelezea mapokeo ya mradi huo na jumla ya ekari ambazo zimeandaliwa akutumika pamoja na gharama zake kwa ujumla ambapo amesema

“Mradi huu upo katika kijiji cha Msolwa kata ya Bwilingu na umepokelewa vizuri na wananchi na vilevile katika mradi huu tunarajia kutwaa eneo kiasi cha ekari 373 ambazo zitagharimu fidia kiasi cha shilingi Bilioni 1.6 na lengo la mradi huu ni kuufanya mji wa Chalinze kuonekana katika sura ya mipango miji na kwa hili tunaishukuru Serikali yetu ya Jamhuri ya Muungano wa Tanzania  kwa kutupatia fedha za mkopo usio na riba kiasi cha Shilingi Bilioni 2.5 na kiukweli fedha hizi zitatusaidia sana kuhakikisha eneo hili linapangwa na linatoa viwanja kwaajili ya huduma mbalimbali za kijamii.” Amesema Ndg. Kichumu.

Ikumbukwe kuwa Halmashauri ya Wilaya ya Chalinze ni moja kati ya Halmashauri 55 nchini zilizonufaika na mradi huu wa kupanga ,kupima na kumilikisha Ardhi  nchini wenye thamani ya Bilioni 50.