Zikatimu amekemea tabia ya Kutotumia fedha za miradi kwa wakati

Imewekwa: March 9th, 2019

Mwenyekiti wa halmashauri ya Wilaya ya Chalinze,Mheshimiwa Saidi Zikatimu amekemea kitendo cha Fedha za miradi kutofanya kazi na kukaa kwenye akaunti za vijiji au Kata kwa muda mrefu pasipo kutumika katika miradi ya maendeleo iliyopangwa  kwa wakati,Mwenyekiti ameyabaini hayo katika ziara anayoendelea nayo katika Kata zote za halmashauri na amebaini dosari hiyo katika ujenzi wa nyumba ya mganga katika zahanati ya Buyuni Kata ya Vigwaza ambayo ilipata fedha za kukamilisha ujenzi miezi mitano iliyopita lakini mpaka sasa ujenzi unasuasua.“halmashauri imetoa milioni 10 kwa ajili ya ukamilishaji nyumba ya mganga tangu mwezi wa kumi mwaka jana hazijatumika bado."Zikatimu alieleza.

     Zikatimu katika hotuba yake katika kijiji cha Buyuni alitoa agizo kwa viongozi na watendaji wa vijiji na Kata kukaa vikao vya uidhinishaji fedha za miradi kwa wakati na ujenzi wa miradi utekelezeke kwa wakati.

      Kwa upande wake Mwenyekiti wa kijiji cha Buyuni Bwana Rajabu Saididi aliahidi kukamilisha ujenzi wa nyumba ya mganga wa zahanati ndani ya siku 14 na kuanza kutumika .

Naye Diwani wa kata ya Vigwaza Mhe Mohsin Bharwani aliupongeza uongozi wa halmashauri kwa ujenzi wa zahanati na nyumba ya mganga na kwa kupata watumishi wa afya wanaoendelea kufanya kazi ya kutoa huduma kwa wananchi,na akatoa ahadi yake kwa Mwenyekiti wa halmashauri kutoa ushirikiano wa hali ya juu katika utekelezaji wa miradi ya maendeleo kwa Fedha inayoletwa na halmashauri kwa Kata ya Vigwaza."nakupongeza Mwenyekiti wangu wa halmashauri kwa kufika Buyuni na kutoa miongozo ya utekelezaji,asante kwa taarifa na kunitembelea katika Kata yangu naomba uendelee na Utamaduni huo kwani nina furaha kuwa na Mwenyekiti Zikatimu ".Barwani alisema.