Zingatieni Kanuni za Kilimo cha Pamba-Ndikilo

Imewekwa: May 24th, 2018

Mkuu wa Mkoa wa Pwani Mhandisi Evarist Ndikilo amewapongeza wakulima wa zao la pamba katika halmashauri ya wilaya ya Chalinze,pongezi hizo amezitoa leo katika ziara yake ya kikazi aliyoifanya katika vijiji vya kata za Mbwewe,Mandera na Miono.Mheshimiwa Ndikilo amekagua  na kuona kilimo cha zao la pamba katika kijiji cha Kwamkonje na kuona jinsi zao hili linavyostawi katika halmashauri ya wilaya ya Chalinze.

Katika ukaguzi huo Mheshimiwa amewataka wananchi wa Chalinze na Mkoa wa Pwani kwa ujumla kupambana na umaskini kwa kulima mazao ya pamba na korosho kwani mazao haya yanastawi vizuri katika mkoa wa Pwani”Nimefarijika na taarifa ya Mkurugenzi wa Halmashauri lakini pia kauli ya mwenyekiti wa halmashauri kwamba zao la pamba linakubali na pia nimejionea mwenyewe”Mhandisi Ndikilo alisema.

Aidha Mkuu wa mkoa aliwataka wakulima wa zao la pamba kuzingatia masharti na kanuni za kilimo bora katika uzalishaji ili kulijengea thamani na kutoliharibu kwa kuchanganya maji na mchanga kwani kufanya hivyo hupelekea kufa kwa soko la pamba katika soko la kimataifa na kupelekea umaskini kwa wanchi au wakulima wa pamba.Ndikilo amewataka wananchi kulima kwa wingi zao la pamba kwani serikali inatoa mbegu,viuatilifu na soko la uhakika kwa wakulima wa zao hili.

Katika ziara hiyo Mkuu wa Mkoa aliweza pia kuona na kukagua kiwanda cha kuchambua pamba katika kijiji cha Mandera,kiwanda ambacho hakifanyi kazi na aliagiza wataalam wa masuala ya umeme kukifanyia uchunguzi zaidi ili kiweze kufanyakazi ya kuchambua pamba kwani malighafi kwa ajili ya kiwanda hicho inapatikana katika mkoa wa Pwani kwa sasa.

Mhandisi Ndikilo alitembelea msitu wa Uzigua ujulikanao kama “Uzigua Forest”ili kuona ustawi wa msitu huo ambao bado unakaliwa na wafugaji kitu ambacho ni kinyume na sheria za misitu.Katika hili Mhandisi Ndikilo aliagiza kuwa zoezi la kuwaondoa wafugaji katika msitu wa Uzigua liwe endelezu ili kuulinda msitu huu kwani ni chanzo cha mvua katika maeneo yetu na pia ni kivutio cha utalii kwani hata wanyama waliotoweka hapo awali wameanza kurejea.”Mkuu wa Wilaya zoezi hili liwe endelevu ili kunusuru msitu huu.”Ndikilo aliagiza.