Baraza la Madiwani lapokea na kujadili taarifa ya Utekelezaji robo ya tatu

Imewekwa: May 17th, 2024

Baraza la Madiwani la Halmashauri ya Chalinze limepokea taarifa ya utekelezaji kutoka kwa wenyeviti wa kamati za kudumu za Halmashauri leo hii na kujadiliwa na hatimaye kupokelewa na Mkutano wa Baraza la Madiwani. 

Katika Mkutano huo Baraza la Madiwani limeweza kupokea taarifa mbalimbali za utendaji kutoka taasisi mbalimbali za serikali zinazojitegemea kama DAWASA,RUWASA,TARURA na TANESCO. Katika taarifa hizo Baraza lilizitaka Taasisi hizo kutoa huduma kwa wananchi kwa wakati sanjari na kutatua kero mbalimbali zinazo wakabili wananchi kwa kila taasisi ili wananchi waweze kufurahia huduma za jamii.

Kwa kauli moja Baraza la madiwani lilipokea taarifa mbalimbali za taasisi isipokuwa taarifa ya DAWASA ambayo ilikataliwa na Baraza la madiwani na meneja wa DAWASA Chalinze kutakiwa kuitisha kikao cha madiwani maalum ili shirika liweze kutoa ufafanuzi juu ya kero za maji katika mji wa Chalinze kwa maana ya uunganishaji wa maji na gharama kubwa za bei za maji zinazotozwa na DAWASA kwa watumiaji wa maji ikilinganishwa na watumiaji wengine katika Mkoa wa Dar es salaam.

Hata hivyo Meneja wa DAWASA Chalinze Bwana Felchesm Kimaro aliahidi kuendelea kutatua Changamoto zinazo wakabili wananchi na zingine kuziwasilisha kwenye mamlaka za juu kwa hatua zaidi.