DC Bagamoyo fanya kikao na Wakuu wa Idara na Vitengo Chalinze

Imewekwa: February 15th, 2023

Mkuu wa wilaya ya Bagamoyo, Mheshimiwa Halima Habibu Okash amefanya kikao na wajumbe wa kamati ya Usalama wilaya na wakuu wa Idara na Vitengo katika halmashauri ya wilaya ya Chalinze,kikao hicho kimefanyika leo katika ukumbi wa mikutano wa Jakaya Kikwete.

Akizungumza na viongozi hao Mheshimiwa Okash aliwapongeza watumishi kwa ujumla kwa kazi wanazofanya katika kuwatumikia wananchi wa Chalinze na Bagamoyo kwa ujumla na kuwapongeza kwa kazi nzuri wanayoifanya katika kukusanya mapato na pia aliwapongeza wanachalinze kwa jinsi walivyoweza kung’ara na kuwa washindi wa kwanza katika mbio za mwenge wa uhuru kwa mwaka 2022.

Mkuu wa wilaya amewataka wakuu wa Idara na wakuu wa vitengo kufanya kazi kwa weledi na akawataka kufanya kazi kwa ushirikiano na akaahidi kushirikiana na watumishi katika kutatua kero za wananchi sanjari na kuitatua migogoro ya ardhi kwa wakati.

Aidha Mheshimiwa Okash alitoa wito kwa wananchi wa Chalinze na Bagamoyo kwa ujumla kupambana na ukatili wa kijinsia kwa kuchukua hatua na kupambana na vitendo hivyo ambavyo ni kinyume cha sheria ili kuwalinda wanawake na watoto na vitendo vya kikatili vinavyoweza kufanywa na watu wasio wema.