Kamati ya Siasa Mkoa yakagua Viwanda

Imewekwa: August 17th, 2018

Kamati ya Siasa ya Halmashauri kuu ya Mkoa wa Pwani leo imekagua na kuona uzalishaji katika viwanda vya Sayona Fruits Ltd na Twyford vilivyo katika Halmashauri ya Wilaya ya Chalinze.Ziara hiyo imeongozwa na Mwenyekiti wa Chama cha Mapinduzi Mkoa wa Pwani Mheshimiwa Ramadhani Maneno na Viongozi mbalimbali wa serikali wakiongozwa na Mkuu wa Mkoa wa Pwani Mhandisi Evarist Ndikilo.

Ziara hiyo imekagua Kiwanda cha Sayona Fruits Ltd kinachotengeneza vinywaji mbalimbali vinavyotokana na matunda,kiwanda hicho kipo katika kijiji cha Mboga kata ya Msoga,hali kadhalika kamati ya siasa Mkoa ilifika katika kijiji cha Pingo kata ya Pera na kukagua uzalishaji wa vigae katika kiwanda cha Twyford.

Kwa mujibu wa Afisa Uhusiano wa kiwanda cha Sayona Bwana Abubakar Mlawa akitoa taarifa fupi ya kiwanda hicho,alieleza kuwa kiwanda hicho mpaka sasa kina thamani ya Dola za Kimarekani zaidi ya milioni 55,na kimetoa ajira kwa watanzania zaidi ya 800 ambao wameajiriwa kiwandani hapo.Aidha kiwanda hicho kinashiriki katika kutoa huduma za jamii kwa wakazi wa Chalinze kama ujenzi wa nyumba ya Mganga na uchangiaji wa ujenzi wa miundombinu ya Elimu katika shule ya sekondari Lugoba.”Kiwanda hiki pia kinawawezesha wananchi wa Chalinze na maeneo jirani kuwapatia soko la matunda wanayolima kwani kiwanda hiki kwa siku kinahitaji tani 300 za matunda .”Mlawa alisema.

Naye Mkuu wa Mkoa wa Pwani Mhandisi Evarist Ndikilo alitoa wito kwa serikali za vijiji na mamlaka za serikali za mitaa kufungua fursa kwa wawekezaji wa viwanda na kuondokana na urasimu wa kutoa ardhi kwani kauli mbiu yetu ni kuwa na viwanda vya kutosha,viwanda ambavyo vitatoa ajira kwa wananchi hususan wakulima wa matunda.”Sayona wanahitaji matunda tani 300 kwa siku hivyo wakulima wa matunda kwa sasa soko la matunda siyo changamoto tena bali ni wananchi kulima kitaalamu ili kuzalisha matunda yenye ubora kwa matumizi ya viwandani.”Ndikilo alisema.

Kwa upande wake Mwenyekiti wa CCM Mkoa wa Pwani ,Ramadhani Maneno ameushukuru uongozi wa kampuni ya Sayona kuiruhusu kamati ya siasa Mkoa kukagua na kuona hali ya uzalishaji wa bidhaa zitokanazo na matunda na kumshukuru mwekezaji kwa juhudi anazozifanya katika kuisadia jamii inayozunguka kiwanda kwa kuwapatia ajira,kununua matunda yanayolimwa na wananchi na kulipa kodi ambayo  ni chanzo cha mapato kwa serikali.

 Aidha Mheshimiwa Maneno aliongezea kwa kusema kuwa; Uungwana wetu wa kuitunza ardhi ni matokeo ya mafanikio kwa Mkoa wa Pwani  kuwa ni Mkoa wa viwanda,kwani uungwana wetu wa kuithamini ardhi kwa kutoiuza, pamoja na umasikini wetu tuliokuwa nao hatukuweza kushawishika na kuiuza.”Mwenyekiti wa Mkoa alisema

Wajumbe wa kamati ya siasa mkoa katika picha ya pamoja baada ya kumaliza kukagua shughuli za uzalishaji katika kiwanda cha vigae cha Twyford

kilichopo katika kijiji cha Pingo(wa saba kutoka kulia) ni Mwenyekiti wa CCM Mkoa wa Pwani,Mhe,Ramadhani Maneno.