Maadhimisho ya wiki ya elimu ya watu wazima yafanyika Chalinze

Imewekwa: September 3rd, 2025

Maadhimisho ya Wiki ya Elimu ya Watu Wazima na Elimu Nje ya Mfumo Rasmi yamefanyika leo katika Ukumbi wa Mikutano wa Shule ya Sekondari Lugoba, iliyopo ndani ya Halmashauri ya Wilaya ya Chalinze. Tukio hilo limewakutanisha wadau mbalimbali wa elimu wakiwemo walimu wakuu wa shule za msingi na sekondari, maafisa elimu kata pamoja na wajasiriamali wanaotengeneza bidhaa mbalimbali kwa matumizi ya binadamu.

Akizungumza katika maadhimisho hayo, Afisa Elimu ya Watu Wazima wa Halmashauri ya Wilaya ya Chalinze, Mwalimu Selemani Nkunguu, aliwasilisha taarifa ya utekelezaji wa shughuli za elimu ya watu wazima kwa mgeni rasmi. Alieleza kuwa, halmashauri imepata mafanikio makubwa katika kuwafikia watu wazima pamoja na wanafunzi wa kike waliokwama kuendelea na elimu kutokana na sababu mbalimbali kama vile kupata ujauzito wakiwa bado shuleni.

Mwalimu Nkunguu alibainisha kuwa elimu ya watu wazima na elimu nje ya mfumo rasmi imekuwa na mafanikio makubwa kupitia mifumo kama MEMKWA (Mpango wa Elimu ya Msingi kwa Waliokosa) na MUKEJA (Mpango wa Kuendeleza Elimu ya Juu kwa Waliokatishwa). Pia, alieleza kuwa walimu wengi wa shule za msingi na sekondari wamejiendeleza kitaaluma kupitia elimu ya masafa, hatua ambayo imewawezesha kutoa mchango mkubwa katika jamii.

Aidha, Nkunguu alisisitiza kuwa mafanikio haya yametokana na juhudi za serikali ya awamu ya sita kupitia sera zake nzuri zinazolenga kutoa fursa sawa za elimu kwa makundi yote ya wananchi, hususan waliokosa fursa ya kupata elimu katika mfumo rasmi. Hii imechangia kuongeza idadi ya wananchi wanaoweza kusoma na kuandika, pamoja na kuwawezesha kushiriki kikamilifu katika shughuli za maendeleo.

Kwa upande wake, Mwakilishi wa Mkuu wa Wilaya ya Bagamoyo ambaye pia ni Afisa Tarafa ya Msata, Bi. Jesca Samson, aliipongeza Halmashauri ya Chalinze kwa juhudi zake madhubuti katika kuhakikisha elimu inawafikia wananchi wote. Alisema kuwa jitihada hizo zimekuwa msaada mkubwa kwa wananchi waliokatishwa masomo, kwani sasa wanaweza kutimiza ndoto zao kwa kupata maarifa yanayowawezesha kubadilisha maisha yao.

Bi. Jesca alieleza kuwa elimu ya watu wazima inasaidia kupunguza ujinga na kuongeza maarifa kwa wananchi, hivyo kusaidia kuinua kipato cha familia na taifa kwa ujumla. Alisisitiza kuwa elimu si kwa ajili ya watoto pekee, bali ni haki ya kila Mtanzania na kwamba kila mmoja anapaswa kutumia fursa hii kujifunza na kujiendeleza.

Katika hotuba yake, mgeni rasmi wa maadhimisho hayo aliwataka wananchi wa Chalinze na maeneo mengine nchini kuendana na kaulimbiu ya mwaka huu isemayo: “Kukuza Kisomo katika Zama za Kidijitali kwa Maendeleo Endelevu ya Taifa Letu.” Alieleza kuwa teknolojia ya kidijitali imefungua fursa nyingi na ni muhimu kwa wananchi kujiendeleza kielimu ili waweze kuzitumia kikamilifu.

Mgeni rasmi alihitimisha kwa kutoa wito kwa wadau wa elimu, viongozi wa serikali za mitaa na jamii kwa ujumla kuendelea kushirikiana katika kuhamasisha elimu ya watu wazima. Alisisitiza kuwa hakuna maendeleo ya kweli bila wananchi kuwa na uelewa wa masuala mbalimbali ya kijamii, kiuchumi na kisiasa kupitia elimu.

Maadhimisho hayo yalihitimishwa kwa maonesho ya bidhaa mbalimbali zinazozalishwa na wajasiriamali waliopata mafunzo kupitia elimu nje ya mfumo rasmi. Maonesho hayo yalionyesha jinsi elimu inavyoweza kubadilisha maisha ya wananchi kwa kuwapa maarifa ya kuzalisha, kuendesha biashara na kujitegemea kiuchumi.