Madiwani wa Chalinze wafurahia uchakataji wa maziwa kiwanda cha ASAS

Imewekwa: May 27th, 2025

Na John Mlyambate, Iringa

Madiwani wa Halmashauri ya Wilaya ya Chalinze mkoani Pwani leo wametembelea kiwanda cha kuchakata maziwa cha ASAS kilichopo katika Manispaa ya Iringa, mkoani Iringa, na kufurahishwa na namna shughuli za uzalishaji wa maziwa zinavyotekelezwa kwa weledi na ubora wa hali ya juu.

Ziara hiyo ni sehemu ya mafunzo kwa viongozi hao wa kisiasa ili kujifunza mbinu bora za uchakataji wa mazao ya mifugo, hasa maziwa, kwa lengo la kuchochea maendeleo ya sekta hiyo katika Halmashauri ya Chalinze. Wakiwa kiwandani hapo, madiwani walipata fursa ya kuona hatua zote za uzalishaji wa maziwa kuanzia mapokezi ya maziwa ghafi, uhifadhi, vipimo vya ubora, uchakataji hadi kufungashwa kwa ajili ya kuingia sokoni.

Madiwani walionesha hamu ya kufahamu kwa kina namna kiwanda hicho kinavyopata maziwa kutoka kwa wafugaji wadogo, na mfumo wa ukusanyaji wa maziwa hayo kutoka vijijini hadi kufikishwa kiwandani. Wakizungumza na menejimenti ya kiwanda, walielezwa kuwa kuna mtandao wa mawakala wanaoshirikiana na wafugaji katika kukusanya maziwa kutoka maeneo mbalimbali ndani na nje ya mkoa wa Iringa.

Kwa mujibu wa Meneja Uendeshaji wa Kiwanda hicho, Bwana Lipita Mtimila, kiwanda hicho hupokea maziwa kutoka kwa wafugaji zaidi ya 2,000 kila siku, ambapo ushirikiano wa karibu kati ya kiwanda na wakulima umechangia katika kuboresha ubora wa maziwa na kuongeza kipato kwa jamii zinazozalisha bidhaa hiyo.

Mbali na kutembelea kiwanda, madiwani pamoja na wataalamu wa Halmashauri ya Chalinze walifika katika shamba la mifugo la ASAS lililopo Matembo, nje kidogo ya Manispaa ya Iringa, ambapo walijionea shughuli za ufugaji wa kisasa wa ng’ombe wa maziwa na jinsi wanavyohudumiwa kwa njia bora za kisayansi ili kuongeza uzalishaji.

Ziara hiyo imewawezesha madiwani kupata uelewa mpana wa mnyororo wa thamani wa maziwa na fursa zilizopo katika sekta hiyo, ambapo waliahidi kuyatumia mafunzo hayo kuhamasisha uwekezaji katika viwanda vidogo na vya kati vya kuchakata mazao ya mifugo katika Halmashauri ya Chalinze.

Kwa upande wao, baadhi ya madiwani walisema ziara hiyo imewafungua macho kuhusu namna sekta binafsi inavyoweza kushirikiana na serikali katika kuongeza ajira, kipato na usalama wa chakula, wakiahidi kuhamasisha mifumo bora ya ufugaji na ukusanyaji wa maziwa katika maeneo yao.